2 years ago
September 17, 2022
सुबास हुमागाईं, काठमाडौं
विसं २०७२ वैशाख ११ / सन् २०१५ अप्रिल २४ – शुक्रबार दशरथ रंगशालामा भएको सेमिफाइनलमा भारतलाई १-० लाई पराजित गर्दै नेपाल फाइनलमा । फाइनलमा उपाधिका लागि बंगलादेशसँग भिड्ने । प्रतियोगिता – एएफसी यू-१४ च्याम्पियनसिप २०१५ (साउथ एन्ड सेन्ट्रल रिजन)
विसं २०७९ भदौ ३१ / सन् २०२२ सेप्टेम्बर १६ – शुक्रबार दशरथ रंगशालामा भएको सेमिफाइनलमा भारतलाई १-० लाई पराजित गर्दै नेपाल फाइनलमा । फाइनलमा उपाधिका लागि बंगलादेशसँग भिड्ने । प्रतियोगिता – साफ महिला च्याम्पियनसिप २०२२
७ वर्षको अन्तरमा नेपालले दोस्रो पटक घरेलु मैदान दशरथ रंगशालामा भारतीय टोलीलाई पराजित गर्दै फाइनलमा यात्रा पक्का गरेको छ । २०७२ सालमा भारतको यू-१४ टोलीलाई सेमिफाइनलमा १-० ले नै पराजित गर्दै नेपालले फाइनलमा स्थान बनाएको थियो । उक्त खेलमा नेपालका लागि निर्मला उपाध्यायले एकमात्र गोल गरेकी थिइन् । निर्मलाले दोस्रो हाफको सुरुवाती मिनेटमै गरेको गोल नै निर्णायक सावित भएको थियो । हाल निर्मला नेपाल पुलिस क्लबसँग आबद्ध छिन् । उनी प्रारम्भिक छनोटमा सहभागी भएपनि अन्तिम टोलीसम्म पर्न सकिनन् ।
सन् २०१५ को उक्त खेलमा नेपालको लागि आक्रमणमा निर्मला उपाध्यायसँग रेखा पौडेल उत्रिएकी थिइन् । रेखा हिजो भएको सेमिफाइनलमा भने बेन्चमा नै रहिन् । सरु लिम्बु र मन्जलीकुमारी योन्जनले ७ वर्षअघि भएको उक्त खेलमा नेपालका लागि सुरुवात गरेका थिए । हिजो सरुले पूरा ९० मिनेट खेल्दा मन्जली डेंगीका कारण बेन्चमै रहिन् । समूह चरणमा श्रीलंकाविरुद्ध डेब्यु गरेकी डिफेन्डर निशा थोकर पनि त्यसबेला यू-१४ टोलीमा सुरुवाती रोजाइमा खेलेकी थिइन् ।
त्यसो त यू-१४ टोलीकी तत्कालिन कप्तान पुजा राना यसबेला सिनियर टोलीको पनि सुरुवाती रोजाइमा हुन्थिन् । तर बन्द प्रशिक्षणको समयमा चोट लागेपछि उनी टोलीबाट बाहिर रहिन् । प्रशिक्षणका दौरान खुट्टा भाँचिएपछि उनी अहिले खुट्टामा प्लास्टरसहित घरमै बसेर खेल हेरिरहेकी छिन् । उनलाई ठिक हुन अझै केही महिना लाग्नेछ ।
सिनियर टोलीका लागि राइट ब्याक भूमिकामा खेल्दै आएकी पुजाले गत वर्ष दशरथ रंगशालामा भएको बंगलादेशविरुद्धको दुवै मैत्रीपूर्ण खेलमा सुरुवाती रोजाइमा खेलेकी थिइन् । यसपटक पनि उनले साफमा उक्त जिम्मेवारी निर्वाह गर्ने देखिन्थ्यो, तर चोटका कारण उनी विश्राम लिन बाध्य भइन् ।
पुजा फाइनल पुगेपछि आफूलाई ७ वर्षअघि रंगशालाको क्षण याद आएको बताउँछिन् । ‘मलाई त हिजो खेल जित्ने बितिक्कै पुरानो दिनको याद आयो । त्यसबेला भारतलाई हराएको क्षण सम्झेर खुसी भएँ । यसपटक पनि टोलीले जित्यो एकदम खुसी लाग्यो । आफू चोटका कारण मैदानबाहिर रहनु पर्दा भने दुख लागेको छ,’ पुजाले सुनाइन् ।
प्रतियोगिता आउन एक महिना भन्दा कम समय बाँकी रहँदा प्रशिक्षणका क्रममा घाइते भएकी पुजाको सम्पूर्ण उपचार खर्च एन्फाले बेहोर्ने उनले जानकारी दिइन् । फाइनलमा बंगलादेशसँग जितका लागि पनि उनले शुभकामना दिइन् । ‘यू-१४ को बेलामा भूकम्पका कारण खेल सरेको थियो । रंगशालामा हुनुपर्ने फाइनल ७/८ महिनापछि लगनखेलमा भयो । त्यसबेला नै भएको भए नतिजा राम्रो हुन्थ्यो, पछि हामी बंगलादेशसँग पराजित भयौं । यसपटक फाइनल रंगशालामा नै हुन्छ र टोलीले जित्छ नै । मेरो शुभकामना छ,’ पुजाले भनिन् ।
७२ साल वैशाख ११ गते शुक्रबार सेमिफाइनलमा भारतमाथि जित हासिल गरेको नेपाली टोलीले वैशाख १२ गते शनिबार हुनुपर्ने फाइनल खेल्न पाएको थिएन । नेपालले आयोजना गरेको एएफसी यू-१४ गर्ल्स रिजनल च्याम्पियनसिप २०१५ (साउथ एन्ड सेन्ट्रल) को तेस्रो स्थानको खेलका लागि इरान र भारत रंगशालामा वार्मअपको तयारी गरिरहँदा भूकम्प आएको थियो । दशरथ रंगशालामा त्यसबेला सेमिफाइनलमा पराजित अर्को टोली इरान र भारत दुवै ड्रेसिङ रुममा रहेका थिए । वार्मअप सेसनका लागि तयार रहँदै गर्दा भूकम्प आएपछि दुवै टोलीका खेलाडी मैदानको बीच भागमा आएर बसेका थिए ।
नेपाल र बंगलादेश फाइनल खेल्न टिम होटेल छाड्ने तयारीमा रहँदा भूकम्प आएको थियो । भूकम्पका कारण प्रतियोगिता स्थगित हुँदा तेस्रो स्थानको खेल रद्द र फाइनल स्थगित भएको थियो । डिसेम्बर २०१५ मा पुन: नेपालमा खेलाइएको खेलाइएको फाइनलमा बंगलादेश १-० ले विजयी रहेको थियो । रंगशाला प्रयोगमा नहुँदा लगनखेलस्थित आर्मीको मैदानमा फाइनल भएको थियो ।
त्यसबेला नेपाली टोलीका प्रशिक्षक किशोर केसी थिए भने बंगलादेशी टोलीका प्रशिक्षक अहिले सिनियर टोलीको नेतृत्व सम्हालिरहेका गोलाम रोब्बानी छोटोन नै थिए । सहायक प्रशिक्षक महबुबुर रहमान लिटु पनि साथमा छन् । त्यसबेला नेपालविरुद्ध फाइनल खेलेको यू-१४ टोलीका ८ सदस्य अहिले सिनियर टोलीमा रहेका छन् । बंगलादेशले यसै साता समूह चरणमा भारतलाई ३-० ले पराजित गर्दा प्लेयर अफ द म्याच चुनिएकी फरवार्ड कृष्णा रानी त्यसबेला टोलीको कप्तान रहेकी थिइन् ।
नेपालले सन् २०१५ मा १-० ले फाइनल हारेपछि त्यसयता उमेर समूहमा बंगलादेशसँग सुखद नतिजा आत्मसात गर्न सकेको छैन । सन् २०१८ को यू-१८ मा फाइनलमा १-० ले पराजित नेपाल सन् २०२१ को यू-१९ मा गोलरहित बराबरी खेल्न सफल भएको थियो । नेपाली टोली सन् २०२२ मा भएको यु-१८ मा भने २-१ ले पराजित भयो । त्यस्तै यू-१५ उमेर समूहको साफ प्रतियोगितामा नेपालले हालसम्म सबै खेलमा हार बेहोरेको छ । नेपाल सन् २०१७ मा ६-० ले, २०१८ मा ३-० तथा २०१९ मा २-१ को हार बेहोर्न पुग्यो ।
सिनियर टोलीमा भने नेपालले हालसम्म बंगलादेशसँग हार बेहोर्नुपरेको छैन । हालसम्म दुई टोलीले सिनियर फुटबलमा ७ खेल खेल्दा नेपालले ५ जित र २ बराबरीको नतिजा निकालेको छ । गत वर्ष सम्पन्न दुई मैत्रीपूर्ण अन्तर्गत पहिलो खेल २-१ ले जितेको नेपाल दोस्रो खेलमा गोलरहित बराबरीमा रोकिएको थियो । साफ च्याम्पियनसिपमा भने नेपालले खेलेका सबै तीन खेलमा जित हासिल गरेको छ ।
बंगलादेशको युवा देखि सिनियर सबै महिला टोलीमा प्रशिक्षक रहेका छोटोनले यसपटक प्रतियोगिता सुरु हुनुअघि आफ्नो टोलीले लामो समय सँगै रहेर खेलेकोले पनि फाइनल पुग्ने दावी गरेका थिए । उमेर समूहदेखि सँगै खेलेकाले टोलीको विकासमा सहयोग पुगेको उनको भनाइ थियो । छोटोनले भनेजस्तै बंगलादेशले यसपटक उत्कृष्ट प्रदर्शन गर्दै फाइनलमा स्थान बनाएको छ । प्रतियोगिता अवधिभर कुनै गोल नखाइ फाइनलमा स्थान पक्का गर्ने क्रममा टोलीले ४ खेलमा २० गोल गरिसकेको छ । कप्तान सविना खातुन एक्लैको नाममा ८ गोल छ ।
प्रदर्शनको आधारमा हेर्दा बंगलादेश प्रतियोगिताकै उत्कृष्ट टोली रहेको छ । विपक्षी प्रशिक्षकले पनि यो कुरा स्वीकार्दै आएका छन् । तर बंगलादेशले नेपालको सामना गरेको छैन । दुवै नेपाल र बंगलादेशले प्रतियोगिताका सबै खेल जितेका छन् । कुनै गोल खाएका छैनन् । इतिहास नेपालको पक्षमा छ भने बंगलादेश त्यो इतिहास बदल्न आतुर छ । हजारौं घरेलु समर्थकका बीच नेपाली टोली पनि पहिलो पटक साफ च्याम्पियन बन्ने लक्ष्यमा छ । नेपाललाई ७ वर्षअघि रंगशालामा खेल्न नपाएको फाइनल यसपटक खेल्ने अवसर मिलेको छ ।
July 26, 2024
काठमाडौं (हाम्रो खेलकुद) – एएफसी च्यालेन्ज लिग प्लेअफको तयारी गरिरहेको अपि पावर चर्च ब्वाइज युनाइटेडले मैत्रीपूर्ण खेलमा त्रिभुवन आर्मी फुटबल क्लबलाई पराजित गरेको छ । अर्को साताबाट भारतमा सुरु हुने डुरान्ड कपको तयारी गरिरहेको आर्मीको भद्रकाली स्थित मुख्यालयको फुटबल मैदानमा खेलिएको खेलमा पाहुना टोली ३-२ ले विजयी रह्यो । चर्च ब्वाइजका लागि फरवार्ड अन्जनले दुई […]
July 26, 2024
सुशिल पन्त क्षेत्री,चितवन सेन्ट्रल कलेज चितवन जिल्ला ए डिभिजन लिग फुटबलमा शुक्रबार सौराहा युवा समाज र पानस युवा क्लब विजयी भएका छन् । शारदानगरको मैदानमा पहिलो खेलमा सौराहाले गीतानगर ब्वाइजलाई ३-१ ले हरायो । खेलमा सौराहालाई जिताउन सुशील घलानले ३५ औं र ५२ औं मिनेटमा गोल गरे । यस्तै लक्की गायकले २७ औं मिनेटमा गोल […]
July 26, 2024
काठमाडौं (हाम्रो खेलकुद) – ललित स्मृति यु-१८ लिग अन्तर्गत शुक्रवार भएका खेलमा सातदोबाटो युथ क्लब र नेपाल पुलिस क्लब विजयी भएका छन् । एन्फा कम्प्लेक्स सातदोबाटमा भएको दिनको पहिलो खेलमा सातदोबाटोले मनाङ मर्स्याङ्दी क्लब माथि २-० को जित दर्ता गरेको हो । सातदोबाटोका लागि सोनाम छिरिङ गुरुङ र प्रज्वल कार्कीले समान १-१ गोल गरे । […]