काठमाडौं (हाम्रो खेलकुद) – नेपाली महिला राष्ट्रिय टोलीका सदस्यत्रय पुनम जर्घा मगर, दीपा राई र इन्दिरा राईले अन्तर्राष्ट्रिय खेल जीवनबाट सोमबार सन्यासको घोषणा गरेका छन् । तीनै खेलाडी त्रिभुवन आर्मी फुटबल क्लबका हुन् ।

त्रिपुरेश्वरस्थित दशरथ रंगशालामा छैटौं संस्करणको महिला साफ च्याम्पियनसिपको समापनसँगै रक्षक पुनम, मिडफिल्डरद्वय दीपा र इन्दिराले सन्यासको घोषणा गरेका हुन् । अखिल नेपाल फुटबल संघ (एन्फा) ले ब्लेजरसहित उनीहरुको विदाई गरेका थिए । दशरथ रंगशालामा राष्ट्रिय खेलकुद परिषद्का सदस्य सचिव टंकलाल घिसिङले तीन खेलाडीलाई ब्लेजर लगाइदिएका थिए ।

झन्डै १६ हजार घरेलुसमर्थकबीच बंगलादेशसँग ३–१ ले पराजित हुँदै नेपाल पाँचौं पटक उपविजेतामा सीमित बन्न पुग्यो ।
डिफेन्डर पुनमले यस साफ च्याम्पियनसिपको सबै चार खेलमा पहिलो रोजाईमा खेल्दै पूरा समय मैदान बिताइन् । दीपा र इन्दिरा सबै चार खेलमा बेञ्चमा नै सीमति रहे ।

पुनम गत वर्ष भदौंमा दशरथ रंगशालामै बंगलादेशसँगको पहिलो मैत्रीपुर्ण खेलपछि स्वास्थ्य स्थितिका कारण राष्ट्रिय टोलीबाट बाहिरिएकी थिइन् । बंगलादेशसँगको पहिलो मैत्रीपुर्ण खेलमा पुनम १२औं खेलाडीको रुपमा मैदान प्रवेश गरेकी थिइन् । उक्त खेलपछि उनमा मुटुमा समस्या रहेको बताइएको थियो । त्यसपछि उनको मुुटुको शल्यक्रिया भएपछि उनले यसै साफ च्याम्पियनसिपमार्फत राष्ट्रिय टोलीमा पूनरागमन गरेकी थिइन् । मुटुको शल्यक्रिया भएपछि पुनमले यसै साफ च्याम्पियनसिपमार्फत राष्ट्रिय टोलीमा पूनरागमन गरेकी थिइन् ।