काठमाडौं (हाम्रो खेलकुद) – भियतनाममा जारी एएफसी यू–१७ एसियन कप छनोट अन्तर्गत समूह चरणको अन्तिम खेलमा आज (आइतबार) नेपालले चाइनिज ताइपेईविरुद्ध खेल्दैछ ।

खेल फु थोस्थित भियत त्रि स्टेडियममा नेपाली समय अनुसार दिउँसो २ः४५ बजे सुरु हुनेछ । समूह ‘एफ’ मा ताइपेईविरुद्ध मैदान उत्रदा नेपाल पहिलो र सान्त्वना जितको खोजीमा रहँदा ताइपेई पनि पहिलो जितको लक्ष्यमा मैदान उत्रनेछ ।

दुवै टोली समूह चरणको एक खेल बाँकी छँदै अंकविहीन भएर प्रतियोगिताबाट बाहिरिसकेका छन् । त्यसकारण दुवै टोली अन्तिम खेलमा जित निकाल्दै प्रतियोगिताको सुखद् अन्त्य गर्न चहान्छ ।

नेपाल पहिलो खेलमा थाइल्याण्डसँग ३–० ले तथा दोस्रो खेलमा भियतनामसँग ५–० ले पराजित भएको थियो । नेपाल समूहमा पुछारमा तथा ताइपेई गोल अन्तरमा नेपालभन्दा माथि अर्थात तेस्रो स्थानमा रहेको छ । ताइपेई पनि भियतनामसँग ४–० र थाइल्यान्डसँग ३–१ ले पराजित भएको थियो ।

भियतनाम ६ अंक जोडेर शीर्ष स्थानमा रहँदा समान ६ अंक नै रहेपनि थाइल्याण्ड गोलअन्तरमा दोस्रोमा रहेको छ । आज नै समूह विजेताका लागि भियतनाम र थाइल्यान्डबीच प्रतिस्पर्धा हुनेछ ।

एसियाका ४४ राष्ट्रले १० अलग अलग समूहमा छनोट खेलिरहेका छन् । हरेक समूहको विजेता स्वत अन्तिम चरणमा प्रवेश गर्नेछ । सबै समूहका गरि उत्कृष्ट ६ उपविजेताले अन्तिम राउन्डमा प्रवेश पाउनेछन् ।