पोखरा (हाम्रो खेलकुद) – नवौं राष्ट्रिय खेलकुद प्रतियोगिता अन्तर्गत पुरुष फुटबलमा गण्डकी प्रदेश र विभागीय नेपाल एपिएफ क्लबले जित हासिल गरेको छ ।

पोखरा रंगशालास्थित फुटबल मैदानमा शनिबार भएको खेलमा प्रदेश १ लाई २–० ले हराउँदै गण्डकीले विजयी सुरुवात गरेको हो ।

समूह ए तर्फ भएको खेलमा गण्डकीले दुवै गोल पहिलो हाफमा गरेको थियो । गण्डकीको जितमा जय गुरुङ र कमल थापाले गोल गरे ।

निकै आक्रामक खेल पस्किएको गण्डकीले खेल सुरु भएको तेस्रो मिनेटमै गोल गरेको हो । जया गुरुङले उत्कृष्ट गोल गर्दै गण्डकीलाई अग्रता १–० को अग्रता दिलाए । २७ औं मिनेटमा कमलले गरेको शक्तिशाली प्रहारले सिधैं जाली चुम्यो ।

त्यसपछि दोस्रो हाफमा पनि गण्डकीले प्रदेश १ लाई दवामा राखेपनि गोल गर्न नसक्दा पहिलो हाफको गोल नै गण्डकीका जितमा पर्याप्त बन्यो ।

यस जितसँगै गण्डकीले ३ अंक जोडेको छ । दुई खेल खेलेको प्रदेश १ को पनि ३ अंक नै छ । गैर आवासिय नेपाली संघ (एनआरएनए) का ८ खेलाडीलाई प्रोटेस्ट लागेपछि पहिलो खेलमा हार बेहोरेको प्रदेश १ ले ३ अंक पाएको छ । एनआरएनए अंकविहीन छ ।

गोस्टेघाटमा एपीएफले मधेश प्रदेशलाई ६–० ले पराजित गरेको छ । एपीएफको जितमा प्रदिप लामाले दुई तथा मणि लामा, आवास लामिछाने, बिकु तामाङ र युवराज खड्काले समान एक गोल गरे ।