एजेन्सी – क्याटलान क्लब बार्सिलोनाले स्पेनिस ला लिगामा सहज जित हात पारेको छ । बार्सिलोनाले घरेलु मैदानमा भिल्लारियललाई ३–० ले पराजित गरेको हो ।

बार्सिलोनाको जितमा पोलिस फरवार्ड रोबर्ट लेवान्डोस्कीको दुई तथा स्पेनिस विंगर अन्सु फातीको एक गोल गरे । तीन गोल पहिलो हाफमा ८ मिनेटको अन्तरमा भएको थियो ।

नोउक्याम्पमा बिहीबार राति खेलको सुरुवातदेखि नै पाहुना टोलीमाथि दवाव बढाएको बार्सिलोनाले ३१औं मिनेटमा लेवान्डोस्कीको गोलबाट अग्रता लिएको थियो । उनले जोडी अल्वाको पासमा गोल गर्न सफल भएका थिए ।

३५औं मिनेटमा लेवान्डोस्कीले व्यक्तिगत र टोलीको लागि दोस्रो गोल गर्दै बार्सिलोनाको अग्रता दोब्बर पारे । त्यसको तनि मिनेटपछि अन्सु फातीले गोल गरेपछि बार्सिलोनाले पहिलो हाफमा ३–० को आरामदायी अग्रता लिन सफल भयो ।

दोस्रो हाफमा पनि बार्सिलोनाले केही अवसर सिर्जना गरेपनि थप गोल निस्कन नसक्दा पहिलो हाफको गोल नै बार्सिलोनाको जितमा पर्याप्त बन्यो । भिल्लारियलले पनि केही अवसर सिर्जना गरेपनि सदुपयोग गर्न नसक्दा हार बेहोर्न पुग्यो ।

भिल्लारियलविरुद्ध दुई गोल गरेसँगै लेवान्डोस्कीले आफ्नो व्यवसायिक खेल करिअरमा ६०१ गोल पूरा गरेका छन् । ३४ वर्षीय लेवान्डोस्की सन् २००० पछि ६ गोल पुरा गर्ने लियोनेल मेस्सी र क्रिस्टियानो रोनाल्डोपछिको खेलाडी बनेका छन् । उनले यो सिजन बार्सिलोनाका लागि १४ खेलमा १६ गोल गरेका छन् ।

लेवान्डोस्कीले बायर्नबाट ३७५ खेलमा ३४४, बोरुसिया डर्टमुन्डबाट १८६ खेलमा १०३, पोलिस क्लब जिनिकबाट २१, पोलिस क्लब लेच पोजनानबाट २१ तथा पोल्यान्डबाट १३४ खेलमा ७६ गोल गरेका छन् ।

यस जितसँगै बार्सिलोनाले शीर्षस्थानको रियल म्याड्रिडसँगको अंक दुरी ३ मा छोट्याएको छ । बार्सिलोनाको १० खेलबाट २५ अंक पुगेको छ । शीर्षस्थानमा रियलको २८ अंक छ । पराजित भिल्लारियल १५ अंक जोडेर नवौं स्थानमा छ ।

ला लिगाकै अर्काे खेलमा अल्मेरियाले जिरोनालाई ३–२ ले तथा ओसासुनाले स्पान्योललाई १–० ले पराजित गरेको छ ।