एजेन्सी – म्यानचेस्टर सिटीले इंग्लिस प्रिमियर लिगमा लिगमा जित निकालेको छ । सिटीले घरेलु मैदानमा ब्राइटन होब अल्वियोनमाथि ३–१ को सहज जित निकालेको हो ।

सिटीको जितमा नर्वेली युवा फारर्ड एर्लिङ ब्राउट हालान्डले दुई तथा केभिन ड्रि ब्रुएनाले एक गोल गरे । ब्राइटनका लियान्द्रो ट्रोससार्डले एक गोल फर्काए ।

इतिहाद स्टेडियममा शनिबार राति भएको खेलको २२औं मिनेटमा हालान्डको गोलबाट सिटीले अग्रता लिन सफल भयो । उनले गोलरक्षक इडर्सन मोराएसको लामो पासलाई नियन्त्रणमा लिदै गोल गर्न सफल भएका थिए ।

४३औं मिनेटमा हालान्डले पेनाल्टीमा गोल गर्दै सिटीको अग्रता दोब्बर पारे । पेनाल्टी बक्समा डंकले बर्नाडो सिल्भालाई फउल गरेपछि रेफ्रीले भिएआरको सहायता लिदै सिटीलाई पेनाल्टी प्रदान गर्दा हालान्ड चुकेनन् ।

५३औं मिनेटमा लियान्द्रो ट्रोससार्डले गोल गर्दै खेललाई २–१ को स्थितिमा ल्याए । उनले सोली मार्सको पासमा गोल गनै सफल भएका थिए । ७३औं मिनेटमा ब्राइटन बराबरीबाट चुक्यो । सोली मार्सले बर्नाडो सिल्भालाई बिट गर्दै दिएको पासमा ट्रोससार्ड मैदानको मध्यभागबाटै एक्लै बल अघि बढाउँदै गरेको प्रहारलाई सिटीका गोलरक्षकले बचाए ।

७५औं मिनेटमा कप्तान केभिन डि ब्रुएनाले गोल गर्दै सिटीको जित पक्का गराए । बर्नाडो सिल्भाको पासलाई ब्रुएनाले नियन्त्रणमा लिदै पेनाल्टी बक्सबाहिरबाट गरेको सशक्त प्रहारले पोस्टको दिशा लिदा ब्राइटनका गोलरक्षकले बचाउने प्रयास गरेपनि सफल हुन सकेन ।

यस जितसँगै सिटीले शीर्षस्थानको आर्सनलसँगको अंक दुरी १ मा छोट्याएको छ । सिटीको ११ खेलबाट २६ अंक पुगेको छ । एक खेल कम खेलेको आर्सनलको २७ अंक छ । पराजित ब्राइटन १५ अंक जोडेर आठौं स्थानमा छ ।

प्रिमियर लिगकै अर्काे खेलमा एभर्टनले क्रिस्टल प्यालेसलाई ३–० ले हराएको छ । एभर्टनको जितमा डोमिनिक काल्भर्ट लेविन, एन्थोनी गोर्डन र डिवाइट म्याकनेलले गोल गरे ।

यस जितसँगै एभर्टन १२ खेलबाट १३ अंक जोडेर ११औं स्थानमा छ । पराजित क्रिस्टलको १३ अंक नै रहेपनि गोल अन्तर र हेड टु हेडमा एभर्टनसँग पछि छ ।