एजेन्सी – युइएफए युरोपा लिगमा म्यानचेस्टर युनाइटेडले सानदार जित निकालेको छ । घरेलु मैदानमा युनाइटेडले मोल्दोभाको एफसी सेरिफलाई ३–० ले पराजित गरेको हो ।

युनाइटेडको जितमा डिएगो डालोट, मार्कुस रासफोर्ड र क्रिस्टियानो रोनाल्डोले गोल गरे । पहिलो हाफमा एक गोल गरेको युनाइटेडले दोस्रो हाफमा दुई गोल थपेको थियो ।

ओल्ड ट्रार्फोडमा बिहीबार राति भएको खेलको ४४औं मिनेटमा डिएगो डालोटको गोलबाट युनाइटेडले पहिलो हाफमा १–० को अग्रता लिएको थियो । उनले क्रिस्टियन एरिक्सनको पासमा गोल गर्न सफल भएका थिए ।

६५औं मिनेटमा मार्कुस रासफोर्डले गोल गर्दै युनाइटेडलाई २–० ले अघि बढाए । उनले लुकास साको पासमा गोल गर्न सफल भएका थिए । त्यसपछि ८१औं मिनेटमा रोनाल्डोले गोल गर्दै युनाइटेडलाई सहज जित दिलाए ।

प्रशिक्षक एरिक टेन ह्यागसँगको खराव सम्वन्धका बावजुत उनले सेरिफविरुद्धको खेलमा पुरै समय मैदानमा बिताएका थिए ।

यस जितसँगै युनाइटेड समूह ‘ईं’ मा ५ खेलबाट १२ अंक जोडेर दोस्रो स्थानमा रहेको छ । पराजित सेरिफ ३ अंक जोडेर तेस्रो स्थानमा रहेको छ ।

यही समूहको अर्काे खेलमा रियल सोसिडाडले साइप्रसको ओमोनिया निकोसियालाई २–० ले पराजित गरेको छ । सोसिडाडको जितमा रोवर्ट नभारो र ब्राइस मेन्डेजले गोल गरे ।

यस जितसँगै सोसिडाड ५ खेलबाट १५ अंक जोडेर शीर्षस्थानमा रहेको छ । पराजित ओमोनिया निकोसिया अंकविहीन हुँदै पुछारमा छ ।