एजेन्सी – पुछारमा रहेको नटिङहम फरेस्टमाथि सानदार जित निकाल्दै लन्डन क्लब आर्सनल इंग्लिस प्रिमियर लिगको शीर्षस्थानमा फर्किएको छ ।

घरेलु मैदानमा नटिङहममाथि ५–० को फराकिलो जित निकालेपछि आर्सनलले म्यानचेस्टर सिटीलाई पछि पार्दै शीर्षस्थानमा फर्र्किएको हो ।

आर्सनलको जितमा रेइस नेल्सनले दुई तथा गाब्रियल मार्टिनेली, थोमस पार्टे र मार्टिन ओडेगार्डले समान एक गोल गरे । पहिलो हाफमा एक गोल गरेको आर्सनलले दोस्रो हाफमा चार गोल थप्दै फराकिलो जित निकाल्न सफल भयो ।

इमिरेट्स स्टेडियम लन्डनमा आइतबार राति भएको एकपक्षीय खेलमा आर्सनलले खेलको पाँचौं मिनेटमा मार्टिनेलीको गोलबाट अग्रता लिएको थियो । उनले बुकायो साकाको पासलाई सदुपयोग गरेका थिए ।

४९औं मिनेटमा रेइस नेल्सनले गोल गर्दै आर्सनलको अग्रता दोब्बर पारे । त्यसपछि ५२औं मिनेटमा नेल्सनले व्यक्तिगत दोस्रो तथा टोलीका लागि तेस्रो गोल गरेपछि आर्सनलले खेलमा ३–० को अग्रता लिन सफल भयो । उनले गाब्रियल जेससको पासमा गोल गर्न सफल भए ।

५७औं मिनेटमा थोमस पार्टेले नेल्सनको पासमा गोल गर्दै आर्सनलले ४–० ले अघि बढाए । त्यसपछि ७८औं मिनेटमा मार्टिन ओडेगार्डले गाब्रियल जेससको पासमा गोल गर्दै आर्सनललाई ५–० को सानदार जित दिलाए ।

यस जितसँगै शीर्षस्थानमा उक्लिएको आर्सनलको १२ खेलबाट ३१ अंक पुगेको छ । दोस्रो स्थानमा रहेको म्यानचेस्टर सिटीको २९ अंक छ । पराजित नटिङहम १३ खेलबाट ९ अंक जोडेर पुछारमा रहेको छ ।