एजेन्सी – फ्रान्सेली प्रतिद्धन्द्धी मार्सेमाथि पूनरागमन जित निकाल्दै इंग्लिस क्लब टोटेनहम हटस्पर युइएफए च्याम्पियन्स लिगको समूह ‘डी’ को विजेता बन्दै प्रि–क्वाटरफाइनलमा प्रवेश गरेको छ ।

टोटेनहमले घरेलु टोली मार्सेमाथि २–१ को पुनरागमन जित निकाल्यो । टोटेनहमको जितमा क्लेमेन्ट लेङ्लेट र पिएरे इमिल होज्वजर्गले गोल गरे । मार्सेका चान्सेल म्हेम्वाको गोल सान्त्वना बन्यो ।

मार्सेमा मंगलबार राति भएको खेलको पहिलो हाफको इन्ज्युरी समयमा चान्सेलको गोलबाट मार्सेले सुरुवाती अग्रता लिएको थियो । उनले जोर्डन भेरेटआउटको पासमा गोल गर्न सफल भएका थिए ।

५४औं मिनेटमा क्लेमेन्ट लेङ्लेटले गोल गर्दै खेललाई १–१ गोलको बराबरीमा ल्याए । उनले इभान पेरिसिसको पासलाई सदुपयोग गरे । त्यसपछि इन्ज्युरी समयको थप गरिएको पाँचौ मिनेटमा पिएरे इमिलले ह्यारी केनको पासमा गोल गर्दै टोटेनहमलाई पूनरागमन जितसहित समुह विजेता बनायो ।

अर्काे खेलमा जर्मन क्लब फ्रान्कफुर्टले पोर्चुगिज क्लब स्पोर्टिङ सिपीमाथि २–१ को पूनरागमन जित निकाल्दै समुह उपविजेताको रुपमा अघिल्लो चरणमा प्रवेश गरेको छ । फ्रान्कफुर्टको जितमा दाइची कामदा र रान्डल कोलो मुएनीले गोल गरे । स्पोर्टिङका आर्थरको गोल सान्त्वना बन्यो ।

यो समूहमा चारै टोलीको नकआउट चरण पुग्ने सम्भावना रहँदा आ–आफ्नो खेलमा सफलता हात पार्दै टोटेनहम र फ्रान्कफुर्ट अघिल्लो चरणमा प्रवेश गरेका हुन् ।

यस नतिजासँगै टोटेनहम ६ खेलबाट ११ अंक जोड्दै समूह विजेता बन्यो । फ्रान्कफुर्ट १० अंक जोडेर दोस्रो हुँदा स्पोर्टिङ ७ अंकसहित तेस्रो तथा मार्से ६ अंक जोडेर पुछारमा रह्यो ।