एजेन्सी – स्पेनिस क्लब रियल म्याड्रिडले युइएफए च्याम्पियन्स लिगको समूह चरणको अन्तिम खेलमा सानदार जित आत्मसात गरेको छ ।

रियलले घरेलु मैदानमा स्कटिस क्लब सेल्टिकमाथि ५–१ को फराकिलो जित निकालेको हो । सान्टियागो बर्नबेउमा बुधबार राति भएको एकपक्षीय खेलमा रियलको फराकिलो जितमा लुका मोड्रिच, रोड्रिगो, मार्काे एसेन्सियो, भिनिसियस जुनियर र फेडे भाल्भेर्डेले गोल गरे । सेल्टिकका जोटाले एक गोल फर्काए ।

खेलको छैटौं मिनेटमा नै लुका मोड्रिचले पेनाल्टीमा गोल गर्दै रियललाई १–० ले अघि बढाए । मोरिट्ज जेन्जले पेनाल्टी बक्समा ह्यान्ड गर्न पुगेपछि रियलले पेनाल्टी पाएको थियो ।

२१औं मिनेटमा रोड्रिगोले पेनाल्टीमा गोल गर्दै रियलको अग्रता दोब्बर पारे । म्याथ्यु ओरिलेले पेनाल्टी बक्समा ह्यान्ड गर्न पुगेपछि रेफ्रीले भिएआरको सहायता लिदै रियललाई पेनाल्टी प्रदान गर्दा रोड्रिगो चुकेनन् । ३५औं मिनेटमा सेल्टिकले पेनाल्टी पाएपनि रियलका गोलरक्षक थिवाउट कोर्टुवाले बचाए ।

५१औं मिनेटमा ड्यानी कार्भाजलको पासमा मार्काे एसेन्सियाले उत्कृष्ट गोल गर्दै रियललाई ३–० ले अघि बढाए । ६१औं मिनेटमा भाल्भेर्डेको पासमा भिनिसियसले गोल गर्दै रियललाई फराकिलो जिततर्फ अघि बढाए । ७१औं मिनेटमा फेडे भाल्भेर्डेले लुकास भास्क्वेजको पासमा गोल गर्दै रियललाई ५–० ले अघि बढाए ।

८४औं मिनेटमा जोटाले फ्रिकिकमा सिधै गोल गर्दै खेललाई ५–१ को स्थितिमा ल्याएपनि त्यसपछि थप गोल निस्कन नसक्दा रियलले फराकिलो जित निकाल्न सफल भयो ।यस जितसँगै रियल ६ खेलबाट १३ अंक जोडेर समूह ‘एफ’ मा शीर्षस्थानमा रह्यो । सेल्टिक २ अंक जोडेर पुछारमा रह्यो ।

यही समूहको अर्काे खेलमा आरबी लाइप्जिगले साख्तर डोनेस्कमाथि ४–० को सानदार जित निकाल्यो । लाइप्जिगको जितमा क्रिस्टोफोर एनकुनकु, आन्द्रे सिल्भा, डोमिनिक जोबोस्लाईले गोल गर्दा एक गोल उपहार पायो । भालेरी बोन्डरले आत्मघाती गोल गरे ।

यस जितसँगै लाइप्जिग १२ अंक जोडेर समूहमा दोस्रो भयो । साख्तर ६ अंक जोडेर तेस्रो स्थानमा रह्यो ।