एजेन्सी – फिफा विश्वकप २०२२ कतारका लागि पूर्व विजेता स्पेनले २६ सदस्यीय टोली सार्वजनिक गरेको छ । स्पेनका प्रशिक्षक लुइस एनरिकेले केहि अनुभवी खेलाडीलाई बाहिर राख्दै टोली घोषणा गरेका हुन् ।

यसअघि नै टोलीमा नरहने पक्का भएका गोलरक्षक डेविड डे हेयासँगै एनरिकेले डिफेन्डर सर्जियो रामोस र मिडफिल्डर थियागो अलाकान्टरालाई पनि बाहिर राखेका छन् । चेल्सीका गोलरक्षक केपा आरिजाबालागा टोलीमा नपर्दा ब्राइटनका रोबर्ट सान्चेज र ब्रेन्टफर्डका डेविड रायाले स्थान बनाएका छन् । मुख्य गोलरक्षकको भूमिका एथ्लेटिक बिल्बाओका उनाइ सिमोन नै रहनेछन् ।

फरवार्ड अन्सु फातीले एनरिकेको टोलीमा स्थान बनाउँदा उनका क्लब सहकर्मी फेरान टोरेस पनि टोलीमा समेटिएका छन् । युवा विंगर निको विलियम्स र फरवार्ड अल्भारो मोराटा पनि टोलीमा रहेका छन् ।

स्पेन विश्वकपको समूह ई मा रहेको छ । स्पेनसँगै चार पटकको विजेता जर्मनी, कोस्टारिका र जापान पनि यस समूहमा छन् । स्पेनले पहिलो खेल २३ नोभेम्बरमा कोस्टारिकासँग खेल्नेछ ।

स्पेनको अन्तिम टोली :

गोलरक्षक : उनाइ सिमोन, रोबर्ट सान्चेज, डेविड राया

डिफेन्डर : सेजार एज्पिलीक्वेटा, ड्यानी कार्भाजल, एरिक गार्सिया, ह्युगो गुइलामोन, पाउ टोरेस, एमेरिक लापोर्ट, जोर्डी अल्बा, जोसे गया

मिडफिल्डर : सर्जियो बुस्केट्स, रोड्री, गाभी, कार्लोस सोलेर, मार्कस लोरेन्टे, पेड्री, कोके

फरवार्ड : फेरान टोरेस, निको विलियम्स, येरेमी पिनो, अल्भारो मोराटा, मार्को एसेन्सियो, पाब्लो सराबिया, ड्यानी ओल्मो, अन्सु फाती