काठमाडौं (हाम्रो खेलकुद) – जनजाती महासंघ जापानले नेपाली महिला राष्ट्रिय फुटबल टोलीका खेलाडीलाई फुटबल बुट प्रदान गरेको छ ।

गत महिना स्वदेशमा आयोजना भएको साफ च्याम्यिनसिप फाइनल पुगेको नेपाली टोलीलाई आगामी दिनमा थप सफलताका लागि ओम कुचा मगरको संयोजत्व तथा नेपाली राष्ट्रिय फुटबल टोलीका पूर्व सदस्य वसन्त गौचनसहितको पहलमा महिला टोलीलाई एडिडासको फुटबल बुट हस्तान्तरण गरिएको हो ।

जापानमा फुटबल प्रशिक्षकका रुपमा कार्यरत गौचनले मंगलबार दशरथ रंगशालामा अखिल नेपाल फुटबल संघ (एन्फा) अध्यक्ष पंकज विक्रम नेम्बाङलाई र उनले महिला टोलीका सदस्यलाई हस्तान्तरण गरेका थिए । साफ च्याम्पिनसिपमा पहिलो पटक भारतलाई हराएको नेपाली टोली फाइनलमा भने बंगलादेशसँग पराजित भएको थियो ।

गौचन गत साता गृह नगर पोखरामा फुटबल एकेडेमीको औपचारिक सुरुवातका लागि स्वदेश फर्केका थिए । एक दशक भन्दा लामो समयदेखि जापानलाई कर्मथलो बनाउदै आएका उनले नाममा वसन्त गौचन (विजी) फुटबल एकेडेमी शनिबार सुरु गरेका हुन् । ३ महिना अघि एकेडेमीमा प्रशिक्षण सुरु भएको थियो । पोखरा महानगरपालिका वडा नम्बर २७ रिठेपानीमा अवस्थित एकेडमी १५ रोपनी जग्गामा रहेको छ ।

दिनको २ सय जनालाई प्रशिक्षण दिन सकिने एकेडेमीको निर्देशकमा एन्फा प्रशिक्षक राजेन्द्र तामाङ, मुख्य प्रशिक्षकमा शम्भु केसी राखिएको छ । नेपालको यू १६, यू २३ हुँदै बसन्त गौचन सन् १९९९ मा काठमाडौंमा भएको आठौं दक्षिण एसियाली खेलकुद (साग) बाट सुपर स्टार बनेका थिए । त्यसको केहि वर्षपछि जापान पुगेका उनले जापानको फनरुट्स फुटबल एकेडेमीमा प्रशिक्षण दिएक थिए । हाल उनले टोकियोकै चोफुओच्का सकर क्लबको युथ टोली सम्हाल्दै आएका छन् ।