एजेन्सी – म्यानचेस्टर सिटीका प्रशिक्षक पेप गुआर्डीओलाले दुई वर्षका लागि सम्झौता थप गर्दै सन् २०२५ सम्म प्रिमियर लिग क्लबसँगै रहने निर्णय गरेका छन् ।

सिटीका लागि चार पटक प्रिमियर लिगसँगै कुल ११ उपाधि जितेका गुआर्डीओला सन् २०१६ मा इंग्ल्यान्ड आएका थिए । उनले आफू विश्वकप उत्कृष्ट क्लबमा रहेको बताए ।

‘म यहाँ आएको पहिलो दिनदेखि नै विशेष महसुस गरिरहेको छु । मेरो लागि यो भन्दा राम्रो ठाउँ छैन । म सिटीमा थप दुई वर्ष बस्न पाउँदा खुसी छु,’ उनले भने ।

सिटी जारी सिजन प्रिमियर लिगको दोस्रो स्थानमा छ । क्लबले च्याम्पियन्स लिगको नकआउट चरणमा आरबी लाइप्जिगको सामना गर्दैछ । उनले सिटीका लागि अबको दशक निकै उत्साहजनक हुने बताए ।

‘मलाई थाहा छ अबको दशक क्लबको लागि उत्साहले भरिपूर्ण हुनेछ । पछिल्लो १० वर्ष जे भयो, अर्को दशक पनि त्यस्तै हुनेछ । क्लबको व्यवस्थापनका कारण पनि यो सम्भव भएको हो,’ उनले बताए ।

क्लबका अध्यक्ष खालदुन अल मुबारकले पनि गुआर्डीओलाले क्लबमा बस्ने निर्णय लिएको खुसी व्यक्त गरे । ‘पेपले हाम्रो क्लबको सफलतामा महत्त्वपूर्ण भूमिका निर्वाह गरेका छन् । उनको नेतृत्वमा क्लबले निरन्तर सुधार गर्दै गएको छ । हरेक सिटी समर्थकजस्तै म पनि आउने दिनका लागि उत्साहित छु,’ उनले भने ।

बार्सिलोनाका लागि ४ वर्षमा १४ उपाधि जितेपछि गुआर्डीओला बायर्न म्युनिख पुगेका थिए । उनले त्यहाँ लगातार तीन सिजन लिग जित्दै सिटी आएका थिए ।