कतार (हाम्रो खेलकुद) – फिफा विश्वकप कतार २०२२ अन्तर्गत समूह ‘एच’ को पहिलो खेलमा उरुग्वे र दक्षिण कोरियाको खेल गोलरहित बराबरीमा सकिएको छ ।

विहीबार एजुकेसन सिटी रंगशालामा दुवै टोलीले पाएको अवसर सदुपयोग गर्न सकेनन् । निकै प्रतिस्पर्धात्मक खेलमा उरुग्वेको दुवै हाफमा १-१ प्रहार पोस्टमा लागेको थियो । कोरियाले आक्रमण बुनेपनि विपक्षी गोलरक्षक रोसेलाई खास समस्या दिन सकेन ।

१९ अ‍ौं मिनेटमा फेडे भालभेर्डेको प्रहार पोस्टभन्दा थोरै माथिबाट गयो । त्यसको केहिबेरमा डार्विज न्युनेज बलसम्म पुग्न ढिला गर्दा गोलरक्षक किम सोङ् ग्युले राम्रो बचाउ गरे ।

३५ अ‍ौं मिनेटमा कोरियाले अग्रता लिने सुवर्ण अवसर खेल फाल्यो । लो क्रसमा ६ यार्ड बक्सको मध्यभागमा अनमार्क रहेका उइजो ह्वाङले बललाई पोस्टको दिशा दिन सकेनन् ।

४३ अ‍ौं मिनेटमा उरुग्वेका लागि पोस्ट बाधक बन्यो । कर्नरमा डिएगो गोडिनको हेडर गोलरक्षक ग्युले छोएपछि पोस्टमा लाग्दै बाहिरिएको थियो ।

६२ अ‍ौं मिनेटमा न्युनेजले बायाँ विंगमा डिफेन्स कटाएर दिएको कटब्याक गोलरक्षक ग्युले दोस्रो प्रयासमा नियन्त्रण गरे । ७५ अ‍ौं मिनेटमा ह्युङ मिन सनले पेनाल्टी क्षेत्र भित्रबाट गरेको प्रयास डिफेन्सले रोके । लगत्तै वैकल्पिक फरवार्ड चो ग्युसङको प्रहारले पोस्ट दिशा लिन सकेन ।

८१ अ‍ौं मिनेटमा न्युनेजले पेनाल्टी क्षेत्र बाहिरबाट गरेको प्रयास पोस्टतर्फ जान सकेन । ८९ अ‍ौं मिनेटमा उरुग्वेका लागि पुन: पोस्ट बाधक बन्यो । फेडे भालभर्डेले २५ यार्ड टाढाबाट गरेको प्रहारमा गोलरक्षक बिट भएपनि पोस्टमा लाग्दै बाहिरियो । लगत्तै अर्कोतर्फ सनको प्रहार पोस्टको दायाँ भागतिर बाहिरियो ।

यस बराबरीले समूह एचमा दुवैले १-१ अंक जोडेका छन् । आजै समूहको अर्को खेलमा पोर्चुगल र घाना भिड्नेछन् ।