सुबास हुमागाईं, कतार

फिफा विश्वकप २०२२ को आयोजक टोली कतार समूह चरणबाट नै बाहिरिएको छ । समूह ए मा शुक्रबार लगातार दोस्रो हार बेहोरेको कतार अंकविहिन हुँदै बाहिरिएको हो ।

आइतबार भएको उद्घाटन खेलमा इक्वेडरसँग २-० ले पराजित हुँदै कतारले खराब सुरुवात गरेको थियो । यसक्रममा कतार विश्वकपको उद्घाटन खेलमा पराजित हुने पहिलो आयोजक टोली समेत बन्यो । सन् १९७० मा मेक्सिकोपछि उद्घाटन खेलमा गोल नगर्ने टोली बनेको कतारले दोस्रो खेलमा भने गोलको खाता खोलेको थियो ।

कतारका लागि सेनेगलविरुद्ध ३-१ को हारमा शुक्रबार अल थुमामा रंगशालामा मोहमद मुन्टारीले गोल गरे । उनले वैकल्पिक खेलाडीको रुपमा गोल गर्दै विश्वकपमा कतारको गोलको खाता खोलेका थिए । यसक्रममा कतार फिफा विश्वकप इतिहासमा गोल गर्ने ७५ औं राष्ट्र पनि बन्यो ।

समूह ए मा आजै भएको अर्को खेलमा नेदरल्यान्ड्स र इक्वेडरबीच १-१ को बराबरी भएपछि कतार समूह चरणबाट नै बाहिरिएको हो । सन् २०१० मा दक्षिण अफ्रिकापछि कतार नकआउट चरण नपुग्ने राष्ट्र बनेको छ । यस्तै समूहको दुई खेल हार्ने कतार पहिलो आयोजक राष्ट्र बन्यो ।

कतार विना कुनै अंक समूहको पुछारमा छ । नेदरल्यान्ड्स र इक्वेडरको ४-४ तथा सेनेगलले ३ अंक जोडेको छ । कतारले अब अन्तिम खेलमा नेदरल्यान्ड्सको सामना गर्नेछ ।