कतार (हाम्रो खेलकुद) – फिफा विश्वकप कतार २०२२ अन्तर्गत समूह चरणको पहिलो खेलमा अर्जेन्टिनालाई पराजित गरेको साउदी अरेबिया दोस्रो खेलमा पोल्यान्डसँग पराजित भयो । पोल्यान्डले एजुकेसन सिटी रंगशालामा साउदीलाई २-० ले पराजित गर्दै आफू अंक तालिकाको शीर्षस्थानमा उक्लियो ।
साउदीले दोस्रो खेल हारेपछि टोलीका प्रशिक्षक हर्भ रेनार्डले आफ्नो टोलीको सम्भावना अझै बाँकी रहेको बताए । ‘आज हामीले राम्रो खेलेका थियौं । तर गोल गर्ने अवसर सदुपयोग गर्न नसक्दा हार बेहोर्नु पर्यो । यस समूहबाट हामी अघि बढ्ने सम्भावना अझपनि छ । यो नबिर्सनुस हामी मरेका छैनौं,’ उनले भने ।
रेनार्डले आजको खेलमा केहि गल्ती भएपनि समर्थकले साथ दिनुपर्ने बताए । ‘सधैं राम्रो नतिजा आउँछ भन्ने हुदैन । तर समर्थकले जितमा होस् या हारमा, साथ छोड्नु भएन । आज हामीले पाएको अवसरमा राम्रो गर्न सकेनौं । केहि व्यक्तिगत गल्ती पनि भए, तर टिममा सबैले समान हेर्नुपर्छ,’ रेनार्डले थपे ।
पोल्यान्डका गोलरक्षक वोजसिएक सेचेज्नीले पहिलो हाफको इन्ज्युरी समयमा पेनाल्टी जोगाउँदै साउदीलाई बराबरी गोल फर्काउनबाट रोकेका थिए । रेनार्डले पेनाल्टी चुकाउनु खेलको अर्को पाटो रहेको बताए । ‘पेनाल्टी चुक्नु खेलको पाटो हो । यसअघिका प्रतियोगितामा पनि हामीले भोगेका छौं । सेचेज्नी नयाँ गोलरक्षक होइनन् । उनको स्तरबारे सबैलाई थाहा छ । उनलाई बधाई छ,’ रेनार्डले टुंग्याए ।
साउदी अरेबियाले अब समूहको अन्तिम खेलमा मेक्सिकोको सामना गर्नेछ । उक्त खेलमा पराजित भए टोली समूह चरणबाट बाहिरिनेछ । बराबरीको नतिजाले समीकरण कस्तो हुन्छ भन्ने आज हुने अर्जेन्टिना र मेक्सिकोबीच नतिजाले थाहा हुनेछ ।
