सुबास हुमागाईं, कतार

अर्जेन्टिनाविरुद्ध समूह चरणको पहिलो खेलमा साउदी अरेबियाले सनसनीपूर्ण जित निकाल्यो । मेस्सीको गोलमा अग्रता लिएको अर्जेन्टिनाविरुद्ध साउदीका सालेह अल शेहरीले बराबरी गोल फर्काएका थिए । अर्जेन्टिनाविरुद्ध गोल गरेका अल शेहरी विश्वकप यात्रामा नेपालको नाम पनि जोडिन्छ ।

विश्वकपको केहि महिनाअघि घाइते भएका उनको रिह्याबिलिटेसनमा नेपाली फिजियोको सहभागिता थियो । अल शेहरी आफैंले पनि चोट लागेसँगै विश्वकप खेल्ने आशा मारिसकेका थिए । तर उनी विश्वकपमा खेलेनन् मात्र, प्रतियोगिताको सबैभन्दा ठूलो नतिजामा महत्त्वपूर्ण भूमिका पनि निर्वाह गरे ।

कतारस्थित खेलकुद उपचारका लागि विश्व प्रसिद्ध अस्पेटारमा उपचार गराउँदा उक्त टोलीमा नेपाली राष्ट्रिय फुटबल टोलीका दुई फिजियो पनि उनको टोलीमा थिए । पुरुष टोलीका फिजियो आविष्कार पुडासैनी र महिला टोलीकी फिजियो नविना श्रेष्ठ वैद्यले जर्मनी र आइसल्यान्डका फिजियोसँग अल शेहरीको रिह्याबमा काम गरेका थिए ।

विश्वकप अन्तर्गत पहिलो खेलमा अर्जेन्टिनाविरुद्ध जितपछि साउदीको चर्चा सबैतिर थियो । दोस्रो खेलमा पोल्यान्डविरुद्ध सकारात्मक नतिजा निकाल्न सके टोलीको नकआउट चरणको यात्रा पक्का हुने थियो । तर टोली रोबर्ट लेवान्डोस्कीको उच्च प्रदर्शनमा २-० ले पराजित हुन पुग्यो ।

हारपछि टिम बसमा फर्कने क्रममा टोलीका खेलाडी निराश हुँदै फर्किरहेका थिए । अल शेहरीले सुरुवातमा कसैसँग बोल्न मानेनन् । उनी अघि बढिरहँदा उनको चोट र पुनरागमनबारे प्रश्न गर्न चाहेको भनेपछि उनी अडिए । आफू नेपालबाट आएको र नेपाली फिजियो पनि उनको उपचारमा सहभागी भएको भनेपछि उनले मुस्कुराए । त्यसपछि भने उनले प्रश्न सोध्न भने ।

विश्वकप सुरु हुनुभन्दा केहि महिनाअघि चोट लाग्नु र पुनरागमनमा नेपाली फिजियोको भूमिका कस्तो थियो भन्ने प्रश्नमा उनको जवाफ थियो, ‘मैले कडा मिहिनेत गरेको थिएँ, त्यसैले विश्वकपमा खेल्न सकें । यो प्रतियोगितामा गोल गरेपछि मिहिनेतको फल प्राप्त भएको महसुस गरेको छु । हामीले आज हार बेहोरेपनि अघि बढ्न सक्छौं भन्ने लाग्छ,’ उनले भने ।

अप्रिल ९, २०२२ मा एसियन च्याम्पियन्स लिगमा अल हिलालका लागि खेल्दा अल शेहरीले चोट बोक्न पुगेका थिए । सारजाहविरुद्ध खेलको छैटौं मिनेटमा नै उनले टोलीलाई अग्रता दिलाएका थिए । तर २९ औं मिनेटमा बल खोस्न जाने क्रम उनको बायाँ खुट्टाको एकिलिस टेन्डन रप्चर (कुर्कुच्चाको माथिल्लो भागमा गम्भीर चोट) हुन पुग्यो । शेहरी चोट लाग्नेबितिक्कै आफ्नो विश्वकप खेल्ने सम्भावना सकिएको महसुस भएको बताउँछन् ।

‘जब म चोट लागेर लडें, मेरो पहिलो सोच विश्वकप गुम्यो भन्ने थियो । मलाई लागेको थिएन म विश्वकप खेल्न सक्ने हुन्छु भनेर । तर म निरन्तर मिहिनेतले आज यहाँ छु,’ शेहरीले पोल्यान्डविरुद्ध दोस्रो खेलपछि हाम्रो खेलकुदसँग भने ।

‘फिजियोमा जान थालेपछि मेरो स्थितिमा सुधार आयो । त्यसपछि भने विश्वकपका लागि तयार हुन सकिन्छ भन्ने आत्मविश्वास पनि जाग्यो ।’

शेहरीले फिजियोको मिहिनेतका लागि धन्यवाद दिए । ‘मेरो लागि फिजियोले निकै मिहिनेत गर्नुभएको छ । नेपालबाट मात्र होइन, अन्य देशबाट पनि हुनुहुन्थ्यो । सबैको उत्तिकै मिहिनेत छ । नेपालबाट आएका (आविष्कार) मेरा साथी पनि हुन् । मलाई साथ दिने सबैलाई धन्यवाद दिन चाहन्छु,’ उनले भने ।

नेपाली राष्ट्रिय फुटबल टोलीका फिजियो आविष्कार पनि अर्जेन्टिना र साउदी अरेबियाको खेलमा अल शेहरीकै जर्सी लगाएर खेल हेरिरहेका थिए । अल शेहरीको गोलपछि उनले सामाजिक संजालमा उनकै जर्सीमा खुसियाली मनाएको भिडियो पनि हालेका थिए ।

पुडासैनी आफ्नो मिहिनेतले विश्व फुटबलको महाकुम्भमा कुनै खेलाडी देख्दा निकै खुसी लागेको बताउँछन् । ‘विश्वकप खेल्ने जुनसुकै खेलाडीको रहर हुन्छ । हामी फिजियोका लागि आफूले उपचार गरेका खेलाडी खेल्नु भनेको आफैं खेले बराबर हो । शेहरीले विश्वकप टोलीमा स्थान बनाउँदा आफ्नो जित भएको ठानेको थिएँ, उनले अर्जेन्टिनाविरुद्ध नै गोल गर्दा त खुसीको सिमा नै रहेन,’ पुडासैनीले खुसी साटे ।

अस्पेटारमा सन् २०२२ मे र जुन महिनामा इन्टर्नसिप गरेका पुडासैनी र वैद्यलाई विभिन्न पक्षमा सिक्ने मौका मिलेको थियो । यसक्रममा अल शेहरीसँगै दर्जनौं खेलाडीसँग काम गर्ने अवसर प्राप्त भयो । इन्टर्नसिपकै क्रममा शेहरी, साउदीकै अलमाल्की लगायत खेलाडीको रिह्याब हेरेका दुवै पछिल्लो ४ वर्षदेखि एन्फामा कार्यरत छन् । विश्वकै प्रसिद्ध अस्पेटारमा काम गर्दा निकै राम्रो अनुभव मिलेको वैद्य बताउँछिन् ।

‘हामीले झन्डै दुई महिना अस्पेटारमा इन्टर्नसिप गर्दा धेरै सिक्न पायौं । फुटबलकै विशेषज्ञ फिजियो र डाक्टरसँग पढ्न पायौं र चोट लागेका खेलाडीसँग काम पनि गर्यौं । अन्तर्राष्ट्रिय स्तरमा चोट लागेदेखि रिह्याबसम्म के कसरी काम गरिन्छ भन्ने सम्पूर्ण प्रक्रिया बुझ्न पायौं र सँगै काम पनि गर्यौं,’ उनले भनिन् ।

नेपालमा पनि अन्तर्राष्ट्रिय स्तरको सुविधा दिन सकिने उनी बताउँछिन् । ‘हामीले कतारमा रहँदा विश्वकप नै खेल्ने खेलाडीसँग पनि काम गर्यौं । यहाँ आएर पनि नेपाली खेलाडीमा त्यो उपचार गरेका छौं । रिह्याबका लागि चाहिने उपकरण अन्तर्राष्ट्रिय स्तरमा उपलब्ध हुनेजस्तो पर्याप्त छैन, तरपनि हामीले सक्दो प्रयास गरेका छौं,’ उनले सुनाइन् ।

नेपालमा पनि पछिल्लो समय फुटबलको फिजियोथेरापी क्षेत्रमा खेलाडीहरुले ध्यान पुर्याउन थालेका छन् । उपलब्ध जनशक्ति राम्रो हुनुले पनि खेलाडीको चोटबाट फर्कने मात्र होइन चोट लाग्ने सम्भावना पनि कम हुन्छ । राष्ट्रिय टोलीका फिजियोद्वयले विश्वकप खेल्ने खेलाडीको उपचार गर्दै उच्च स्तरमा आफूलाई प्रमाणित गर्नु उदाहरण मात्र हो । एन्फाले फिजियो र स्वास्थ्य क्षेत्रमा राम्रो ध्यान दिने हो भने, नेपालमै पनि चोटको समस्या कम हुँदै जानेछ ।