प्रकाश तिमल्सिना, काठमाडौं

विश्वकप फुटबल, अर्जेन्टिना र डेढ दशकभन्दा लामो समयदेखि टोलीका मुख्य केन्द्रविन्दु लियोनल मेस्सीको चर्चा स्वभाविक छ । अर्जेन्टिनाको फुटबल टोलीलाई समर्थन नगर्नेले पनि मेस्सीको प्रदर्शनको प्रशंसा गर्छन् नै ।

आधिकारिक सर्वेक्षण नभएपनि नेपालमा विश्व कपमा अर्जेन्टिनलाई समर्थन संख्या तुलानात्मक रुपमा बढी छ । सन् १९८६ मा अर्जेन्टिनाले विश्वकप जितेपछि नेपालमा अर्जेन्टिनालाई पछ्याउने गरिएको विश्वास गरिन्छ । त्यो समयको आसपास नेपालमा टेलिभिजनको सुरुवात र डिएगो म्यारोडोनाको अर्जेन्टिनाले विश्वकप जितेपछि धेरै नेपाल अर्जेन्टिनाको समर्थक बनेका हुन् ।

अर्जेन्टिनाले विश्वकप जित्दाको पुस्तालाई पछ्याउँदै अर्जेन्टिनाको समर्थन गर्नेहरुको संख्या अहिले पनि ठूलो छ । त्यसमा फुटबल खेलाडी डोना थापा पर्छन् । फुटबलका कारण मात्र होइन सामाजिक सञ्जालमा क्रियासिल भएका कारण पनि डोना परिचित खेलाडी हुन् । यद्दपी उनले राष्ट्रिय फुटबल टोलीबाट खेल्ने अवसर भने अझै पाइसकेका छैनन् । उनी कुनै दिन देशका लागि खेल्नेमा आशावादी भने छन् ।

हाल भाइ एलन भारतीय सेनामा रहेकाले विश्वकप हेर्दा घरमा ६ जनामध्ये ५ जना अर्जेन्टिना र मेस्सीका समर्थक हुन्छन् । डोनाकी हजुर आमा भने क्रिस्टियानो रोनाल्डोको समर्थक हुन् । विश्वकपको समयमा हजुरआमा एक्लै रोनाल्डोको समर्थनमा रहने गरेको डोना सुनाउँछन् । ‘ड्याड, ममी, बुहारी र हामी ३ भाई नै अर्जेन्टिनाका समर्थक’, हाँस्दै उनले भने, ‘हजुर आमालाई भने रोनाल्डो र पोर्चुगल मन पर्ने । रोनाल्डो ह्यान्डसम छ, राम्रो खेल्छ, फ्रिकिक पनि राम्रो हान्छ भन्नुहुन्छ । हामी सबै सँगै बसेर खेल हेर्ने गरेका छौं ।

फुटबल बुझेबाटै अर्जेन्टिनाको समर्थक रहेका डोना परिवारिक कारणबाटै समर्थक बनेको विश्वास गर्छन् । ‘ड्याडीहरुको समयमा अर्जेन्टिना र म्यारोडोनाको निकै चर्चा थियो अरे । त्यति बेलाको नम्बर १ खेलाडी’, उनले सुनाए , ‘त्यसैले होला अर्जेन्टिनाको समर्थनमा हामी दोस्रो पुस्ता त्यहि लाइनमा उभियौं ।’

डोनाको नामसँग अर्को रमाइलो संयोग पनि जोडिएको छ । डोनाको सुरुको नामा योहन्ना थियो । पछि उनको नाम डोना राखिएको उनी सम्झन्छन् । ‘ड्याडीलाई म फुटबल खेलाडी बनोस् भन्ने थियो अरे । चर्चित खेलाडी र आफूले मन पराउने खेलाडी म्याराडोनाबाटै प्रेरित भएर मेरो नाम म्यारोडोना राखिएको रहेछ’, उनले स्मरण गरे, ‘हाम्रोमा बोलिचालीमा म्याराडोना नाम अलि अप्ठेरो सुनिने भएपछि म्याराडोनाबाट मेरो नाम डोना राखिएको रहेछ । अहिले सम्झदा खुसी लाग्छ ।’

व्यक्तिगत रुपमा ब्राजिलियन महान खेलाडी रोनाल्डिन्होको खेलबाट प्रभावित रहेर उनकै खेललाई पछ्याउने कोशिस गरेका डोना अरुको प्रतिक्रिया पनि त्यस्तै आउने बताउँछन् । ‘म ब्राजिलियन खेलाडीकै शैलीमा खेल्छ भन्ने प्रतिक्रिया पाउँछु’, उनले थपे, ‘मलाई त्यो सुन्दा खुसी लाग्छ । म फ्रि स्टाइल खेल्न मन पराउँछु ।’

डोनालाई विश्व फुटबलमा मेस्सी अब्बल लाग्छ । उनलाई गड गिफ्टेड खेलाडी मान्छन् । ‘त्यस्तो स्किलफुल खेलाडी इतिहासमै कमै मात्र हुन्छन्’, डोना भन्छन्, ‘उनी आफ्नो लागि खेल्दैनन् टोलीका लागि खेल्छन् । टोलीको आवश्यकता अनुसार आफूलाई त्यहि भूमिकामा ढाल्न सक्छन् ।’

मेस्सीको अर्जेन्टिनाले उपाधिमा दाबेदारी प्रस्तुत गरेको डोना मान्छन् । यद्दपी साउदी अरेबियासँगको २–१ को प्रदर्शनले भने अरुलाई जस्तै उनलाई निराश बनाएको थियो । ‘त्यो खेल त सम्झन पनि मन लाग्दैन’, डोना भन्छन् ।

तर, त्यसपछिका खेल र विशेष गरि पोल्यान्डसँगको प्रदर्शन पछि भने अर्जेन्टिना बलियो दाबेदार भएको उनी मान्छन् । उनी थप्छन्, ‘आज अर्जेन्टिनालाई हराउने छ । अर्जेन्टिनाले उपाधि जित्ने बलियो सम्भावना देखिन्छ ।’

मेस्सीका बारेमा चर्चा गरेर डोना थाक्दैनन् । मिडफिल्डर डोना भन्छन्, ‘फुटबल खेल्द एकदमै सजिलो छ भन्ने देखाउने मेस्सी नै हुन् । फुटबल खेल्दा धेरैले दबाब र गाह्रो गरेर खेलेको देखिन्छ । तर मेस्सीमा त्यस्तो दबाब केहि देखिन्न । जस्तो परिस्थितिमा पनि उनी सहज फुटबल खेल्छन् । बललाई एकदमै खुट्टाको नजिक राखेर खेल्ने भएकाले उनको बल खोस्न गाह्रो छ । टोलीको आवश्यकता अनुसार फरवार्ड, मिडफिल्ड होस् वा विङ्स जताबाट पनि खेल्न सक्छन् । एकदमै क्रिएटिभ खेलाडी हुन् । समकालिन खेलाडीमा उनको जस्तो स्किल छैन भन्दा पनि हुन्छ ।’

डोनाको राष्ट्रिय टोलीबाट खेल्ने उनको सपना छ । हरेक फुटबल खेलाडीलाई राष्ट्रिय झण्डा छातीमा टासेर खेल्ने सपना हुन्छ । मेरो पनि छ । आशा छ भविष्यमा खेल्नेछु । गत वर्ष उनी त्यसको नजिक पुगेपनि सफल भने हुन सकेनन् ।

नेपाल सुपर लिगको प्रदर्शनबाट प्रभावित भएर उनलाई तत्कालिन प्रशिक्षक अब्दुल्ला अल्मुताइरीले प्रशिक्षणमा डाकेका थिए । ‘अरुभन्दा फरक खेलाडी भनेर सबैको अगाडि भन्नु हुन्थ्यो । खुसी लाग्थ्यो’, उनले भने, ‘तर, पछि उहाँले सामाजिक सञ्जाल र फुटबल मध्ये एक छानेको अवस्थामा मात्र आफ्नो टोलीमा पर्ने शर्त राख्नु भयो। मैले म टोलीमा रहँदा सम्म सामाजिक सञ्जालमा नस्क्रिय रहन्छु भने । तर उहाँले आफ्नै अगाडि सबै एकाउन्ट डिलिट गर्नुपर्ने शर्त राखेपनि त्यो भने गर्न नसक्ने बताए । त्यसपछि म परिनँ।’

‘ठिकै छ अझै समय छ भविष्यमा टोलीमा पर्नका लागि कोशिस जारी राख्नेछु । आज जहाँ छु फुटबलकै कारण छु । खुसी र सन्तुष्ट छु ।’

थ्री स्टार क्लबसँग आबद्ध रहेका डोनाले दुई वर्षअघि चोटबाट पुनरागमन गर्दा श्री भगवती क्लब टोखाबाट खेलेका थिए । त्यसबेला माइला भाइ एलन र कान्छा एरोनले एकै टोलीबाट सँगै खेलेका थिए । एरोनले फ्रेन्ड्स क्लबबाट ए डिभिजन खेलिसकेका छन् भने एलन भारतीय सेनाको शीर्ष टिममा आबद्ध छन् ।

विस्तृत : एउटै क्लबबाट फुटबल खेल्दै तीन दाजुभाई