कतार (हाम्रो खेलकुद) – फिफा विश्वकप कतार २०२२ अन्तर्गत अन्तिम १६ मा स्पेनविरुद्ध खेल्नुअघि मोरक्कोका प्रशिक्षक वालिद रेग्रागुइले स्पेनिस फुटबलबारे आफूलाई जानकारी भएको बताएका छन् ।

प्रशिक्षक वालिदले स्पेनविरुद्ध खेल फाइनलसरह हुने बताए । ‘स्पेन विश्वकपको उपाधि दावेदार हो । स्पेनलाई घर पठाउन सक्यौं भने प्रतियोगिताको सबैभन्दा ठूलो नतिजा हुनेछ । यसले हाम्रो देशको फुटबलमा पनि निकै फरक पर्नेछ । हाम्रो लागि यो फाइनल अघिको चौथो फाइनलसरह हुनेछ,’ उनले भने ।

मोरक्को र स्पेनबीच खासै धेरै दुरी छैन । त्यसैले दुई देशबीच धेरै कुरा मेल खान्छ । सामाजिक रुपमा मात्र होइन यसले फुटबलमा पनि असर गरेको वालिद मान्छन् । ‘हामी स्पेनको फुटबल बुझ्छौं ‌। हाम्रा धेरै खेलाडी स्पेनिस लिगमा खेलिरहेका छन् । हामीले स्पेन फुटबल नजिकबाट बुझेका छौं । तर‌ यसो भन्दैमा खेल सहज भन्ने हुँदैन । स्पेन विरुद्ध उत्कृष्ट प्रदर्शन गरेमात्र हामी नतिजा निकाल्न सक्नेछौं ,’ उनले थपे ।

स्पेन तुलनात्मक रुपमा बढी अनुभवी भएपनि अर्को स्तरमा जान यस्तो खेल जित्नुपर्ने उनले बताए । ‘हामी ३६ वर्षपछि यो ठाउँमा आइपुगेका छौं । स्पेनका लागि यो नियमित प्रक्रिया हो । हाम्रो तुलानमा स्पेनमा धेरै अनुभव पनि छ । तर हामी अर्को स्तरमा जान चाहन्छौं भने यस्ता खेल जित्नुपर्ने हुन्छ,’ उनले थपे ।

स्पेनका प्रशिक्षक भन्छन् : ‘हरेक खेलाडीलाई हजार पेनाल्टी हान्ने होमवर्क दिएको थिएँ’