एजेन्सी – फिफा विश्वकप कतार २०२२ अन्तर्गत ब्राजिल र क्रोएसियाबीच जारी पहिलो क्वाटरफाइनल खेल अतिरिक्त समयमा लम्बिएको छ । निर्धारित ९० मिनेटमा दुवै टोलीले गोल गर्न नसक्दा खेलमा ३० मिनेट थप हुने भएको हो ।
क्रोएसियाका गोलरक्षक डोमिनिक लिभाकोभिचले लगातार बचाउ गर्दै ब्राजिललाई अग्रता लिन दिएनन् । उनले ब्राजिलको ८ आक्रमणलाई विफल पारेका थिए । विशेषगरी चलायमान देखिएका नेयमारविरुद्ध क्रोएसियाली गोलरक्षक निकै चनाखो देखिएका छन् ।
पहिलो हाफको तुलनामा ब्राजिलले दोस्रो हाफमा आक्रमणमा थप अवसर सिर्जना गरेपनि गोल गर्न भने सकेन । ब्राजिलले आक्रमणमा फितलो प्रदर्शन गरेका रिचार्लीसन, भिनिसियस जुनिअर र रिचार्लीसन तीनै जनालाई परिवर्तन गरिसकेको छ ।
क्रोएसियाले पनि आक्रमणमा दुई खेलाडी परिवर्तन गरेको छ । मारियो पासालीच र आन्द्रे क्रामारीचको स्थानमा ब्रुनो पेक्टोभिच र निकोला भ्लासिच मैदानमा छन् । क्रोएसियाले आक्रमणमा आधा दर्जन अवसर सिर्जना गरेपनि गोलरक्षक एलिसनलाई समस्या दिन सकेका छैनन् ।
आज हुने दोस्रो क्वाटरफाइनलमा नेदरल्यान्ड्स र अर्जेन्टिना भिड्नेछन् । खेल नेपाली समयअनुसार मध्यरात १२:४५ बजे सुरु हुनेछ ।
