एजेन्सी – फिफा विश्वकप कतार २०२२ मा अर्जेन्टिनाका प्रशिक्षक र समर्थकले बंगलादेशबाट आफ्नो टोलीले पाएको समर्थनको खुलेर प्रशंसा गरेका छन् । तर बंगलादेशका क्रिकेट खेलाडीले भने मंगलबार राती हुने क्रोएसियाविरुद्धको सेमिफाइनल खेल हेर्न नपाउने भएका छन् ।

बंगलादेश र भारतबीच बुधबार सुरु हुन लागेको टेस्ट सिरिजका कारण प्रशिक्षक रसेल डोमिंगोले आफ्ना खेलाडीलाई विश्वकप नहेर्न भनेका छन् । अर्जेन्टिना र क्रोएसियाबीच हुने सेमिफाइनल खेल बंगलादेशको स्थानीय समयअनुसार मध्यरात १ बजे सुरु हुनेछ । अतिरिक्त समय र पेनाल्टीसम्म पुगे खेल विहान ४ बजेसम्म चल्नेछ । यसकारण प्रशिक्षक डोमिंगोले आफ्ना खेलाडीलाई खेल नहेर्न बताएका हुन् ।

‘खेलाडीले सुत्नुपर्छ । यो सामान्य कुरा हो । विहान ३-४ बजेसम्म उठेर खेल हेर्ने अनि ९:३० बजे टेस्ट खेल्ने भन्ने कुरै हुँदैन । यो मुर्खता हुनेछ । यदि खेलाडी उठेर हेरे भने म निराश हुनेछु’, दक्षिण अफ्रिकी प्रशिक्षकले भने ।

यसअघि भारत र बंगलादेशबीच भएको तेस्रो एकदिवसीय खेलअघि पनि ब्राजिल र अर्जेन्टिनाको खेल थियो । उक्त खेल हेर्न क्रिकेटरहरु रातभर जाग्राम बसेपछि खेलमा असर परेको थियो । उक्त खेल बंगलादेश २ सय २७ रनले हार्न पुगेको थियो । डोमिंगोले त्यसै कारण पनि खेलाडीलाई आजको खेल नहेर्न भनेका छन् ।

यो पनि : अर्जेन्टिनाका प्रशिक्षकले बंगलादेशलाई धन्यवाद दिए