एजेन्सी – लुसेल आइकोनिक रंगशालामा आइतबार राति फिफा विश्वकप कतार २०२२ को उपाधिका लागि फ्रान्स र अर्जेन्टिनाबीच प्रतिस्पर्धा हुँदैछ । यो खेल नेपाली समयअनुसार राति ८:४५ बजेपछि हुनेछ ।

फ्रान्स र अर्जेन्टिना विश्वकपमा आमने सामने हुन लागेको भएपनि खेलको केन्द्रविन्दुमा लिओनेल मेस्सी र किलीयन एमबाप्पे रहनेछन् । ३५ वर्षीय मेस्सीले क्लब फुटबलमा सम्भव सबै उपाधि जित्दै कीर्तिमानी सातपटक बालोन डी’ओर अवार्ड जितेका छन् । तर उनले करिअरमा एकपटक पनि फिफा विश्वकप जित्न सकेका छैनन् ।

अर्जेन्टिनाका गोलकिपर इमिलियानो मार्टिनेजले फाइनलअघि भनेका छन्, ‘मानिसहरूले फ्रान्सलाई मनपर्ने भन्छन्, तर हामीसँग सबै समयका उत्कृष्ट खेलाडी भएको फाइदा छ । म सधैं भन्छु, हामीसँग सर्वकालीन महान खेलाडी छन् । र राम्रो डिफेन्सको साथले हामीसँग लक्ष्यमा पुग्ने धेरै मौकाहरू छन् ।’

फ्रान्सका मुख्य प्रशिक्षक डिडियर डेसच्याम्प्सले आफ्नो देशलाई १९९८ मा विश्वकप जिताउन कप्तानी गरे । त्यसपछि, प्रशिक्षकको रूपमा चार वर्षअघि रसियामा अर्को सफलता दिलाए । यसपटक सारा विश्व मेस्सीले विश्वकप उपाधि जित्ने कामना गरिरहँदा उनले एक्लो महसुस गरेको बताए ।

‘यसपटक अर्जेन्टिना मात्र होइन, संसारभरका धेरै मानिसहरू र सायद केही फ्रान्सेली मानिसहरू, लियोनल मेस्सीले विश्वकप जित्ने आशा राखेका छन् । मैले एक्लो महसुस गरिरहेको छु । तर हामी लक्ष्य प्राप्त गर्न हरसम्भव प्रयास गर्नेछौं,’ फ्रान्सका प्रशिक्षक डेस्च्याम्प्सले भने ।

के मेस्सीले अर्जेन्टिनालाई १९८६ पछि विश्वकप जिताउन मद्दत गर्न सक्छन् ?

यसपटक विश्वकप फाइनलमा पुगेका टोलीका मुख्य खेलाडी नै गोल्डेन बुट र गोल्डेन बल जित्ने दौडमा छन् । अर्जेन्टिनाका कप्तान लियोनेल मेस्सी र फ्रान्सका केलियन एमबाप्पेले यस विश्वकपमा समान ६ खेल खेल्दा समान ५ गोल गरेका छन् । मेस्सीले ३ असिस्ट दिदा एमबाप्पेले २ असिस्ट दिएका छन् । फ्रान्सका ओलिभिएर जिरुड र अर्जेन्टिनाका जुलियन अल्भारेजले समान ४ गोल गरेर उनीहरुलाई पछ्याइरहेका छन् ।

मेस्सीले अर्जेन्टिनालाई ब्राजिलमा सन् २०१४ को फाइनलमा पुर्याउन मद्दत गरे । यद्यपि जर्मनीका मारियो गोट्जेले अतिरिक्त समयमा गोल गर्दै अर्जेन्टिनालाई उपाधि विमुख बनाइदिए । तर पेरिस सेन्ट जर्मेनका यि मेस्सी कतारमा अर्जेन्टिनाको फाइनल यात्रामा मुख्य शक्ति बनेका छन् ।

कतार विश्वकपको पहिलो खेलमा साउदी अरेबियाविरुद्ध २–१ को हारमा मेस्सीले पेनाल्टीमार्फत सुरुवाती गोल गरेपनि त्यो अग्रता जोगाउन नसक्दा अप्रत्यासित हार बेहोर्न पुग्यो । तर, त्यो हारपछि अर्जेन्टिनाले लय समात्यो । मेक्सिकोलाई २–०, पोल्याण्डलाई २–०, अष्ट्रेलियालाई २–१, नेदरल्यान्ड्सविरुद्ध २–२ को बराबरीपछि अतिरिक्त समयमा ४–३ को जित सेमिफाइनलमा क्रोएसियालाई ३–० ले हराएर फाइनलमा पुग्न सफल भयो ।

अर्जेन्टिनाले सन् १९७८ मा घरेलु मैदानमा र सन् १९८६ मा मेक्सिकोमा भएको विश्वकप गरी दुईपटक उपाधि जित्दा आइतवार तेस्रो जितको खोजीमा छ ।

‘म पहिले नै भावुक भएको छु किनकि उनीहरूले सबै कुरा निष्ठापूर्वक दिएका छन्,’ अर्जेन्टिनाका प्रशिक्षक लियोनेल स्कालोनीले भने, ‘हामीले उपाधि जित्ने आशा गरौं र यदि यो हुन सक्दैन भने पनि उनीहरूले गर्व गर्नुपर्छ, किनकि यो आनन्द लिने क्षण हो ।’

एमबाप्पेको भर र फ्रान्सलाई स्वास्थ्यको चिन्ता

२३ वर्षीय एमबाप्पेले आफ्नो दोस्रो विश्वकप सफलता पछ्याइरहेका छन् र फ्रान्सलाई फाइनलमा पुर्याउन महत्वपूर्ण भूमिका खेलेका छन् । उनले अष्ट्रेलियामाथि ४–१ को जितमा एक पटक र डेनमार्कमाथि २–१ को जितमा दुई गोल गरे । ट्युनिसियासँग १–० ले पराजित भएपनि फ्रान्स समूह विजेता बन्यो ।

एम्बाप्पेले पोल्याण्डमाथि ३–१ को जितमा २ गोल थप्दै आफ्नो गोलसंख्या ५ पुर्याए । क्वार्टरफाइनलमा इंग्ल्यान्डलाई २–१ र सेमिफाइनलमा मोरक्कोलाई २–० ले पराजित गर्दा एमबाप्पेले गोल गर्न सकेनन् । तर विपक्षी खेलाडीले उनलाई निरन्तर आफ्नो नजरमा राखेका थिए ।

सन् १९९८ र २०१८ को च्याम्पियन फ्रान्स २००६ मा इटालीसँग टाइब्रेकरमा पराजित भएको थियो । फ्रान्सले चौथोपटक फाइनल खेल्दा तेस्रो उपाधि जित्ने लक्ष्यमा हुनेछ । तर फ्रान्सको उपाधि रक्षा अभियानमा स्वास्थ्यको चिन्ता थपिएको छ । मिडफिल्डर एड्रियन राबिओट र डिफेन्डर डेयोट उपमेकानो सेमिफाइनलमा अनुपस्थित रहेर प्रशिक्षणमा फर्केका छन् । डिफेन्डरद्वय राफाएल भारान र इब्राहिमा कोनाटेसँगै विंगर किङ्सले कोमानले फ्लुसँग जुधिरहेका छन् ।

‘हामीसँग फ्लू जस्तो लक्षणका केही केसहरू छन्,’ डेसचम्प्सले भने, ‘हामी अन्यत्र नफैलियोस भनेर होसियार हुन कोशिस गर्दैछौं । हामी सबै आवश्यक सावधानीहरू अपनाउँदैछौं ।’