पोखरा (हाम्रो खेलकुद)– आहा रारा पोखरा गोल्डकप फुटबल प्रतियोगिताको २२ औं संस्करणको विजेताको टुंगो शनिबार लाग्नेछ । उपाधिको छिनोफानोसँगै एक खेलाडी प्रतियोगिताको सर्वोत्कृष्ट खेलाडी घोषित हुनेछन् ।

आहा रारा पोखरा गोल्डकपमा यसपटक सर्वोत्कृष्ट हुने खेलाडी टेल्जी इलोक्ट्रोनिक स्कुटर टाइगर प्राप्त गर्नेछन् । चिनिया कम्पनी टेल्जीको नेपालका लागि आधिकारिक विक्रेता टेल्जी नेपाल स्कुटरको प्रायोजन गरेको हो । टेल्जी नेपालले पछिल्लो तीन वर्षदेखि इलोक्ट्रोनिक स्कुटर विक्री गर्दैको छ ।

विक्रीका लागि अहिले दुई वटा मोडल रहेको टेल्जी नेपालका निर्देशक सञ्जिव शिल्पकारले बताए । उनका अनुसार टेल्जीको इलोक्ट्रोनिक स्कुटर संयुक्त राष्ट्रसंघको इन्भारोमेन्ट पार्टनरका रुपमा रहेको छ । देशकै प्रतिष्ठित फुटबल प्रतियोगिता आहा रारा पोखरा गोल्डकपमा सहकार्य गर्न पाउँदा खुसी लागेको शिल्पकारले बताए ।

‘ आहा रारा गोल्डकप देशकै प्रतिष्ठित नकआउट फुटबल प्रतियोगिता मध्येको एक हो । अनाथहरुलाई समेत सहारा दिएर फुटबल एकेडेमी सञ्चालन गरिरहेको छ,’ शिल्पकारले भने,‘राष्ट्रिय फुटबल टोलीका पूर्व कप्तान अनिल गुरुङलगायतका खेलाडी तयार पार्ने क्लब सहारा क्लब हो । त्यसैले हामीले क्लबको प्रस्तावलाई सहर्ष स्वीकारेका हौं ।’

सहारा क्लब पोखराको आयोजनामा पोखरा रंगशालामा जारी आहा गोल्डकपको उपाधिका लागि शनिबार संकटा क्लब र भुटनिज युथ एससी अमेरिकाबीच प्रतिस्पर्धा हुनेछ । प्रतियोगिताको विजेताले १२ लाख र दोस्रो हुने टोलीले ६ लाख रुपैयाँ प्राप्त गर्नेछ ।