विजय नेपाली, पोखरा

आहा रारा पोखरा गोल्ड कप फुटबल प्रतियोगिताको उपाधिका लागि भइरहेको प्रतिस्पर्धा अतिरिक्त समयमा गएको छ । सहिद स्मारक ए डिभिजन टोली संकटा क्लब र भुटनिज युथ एससी अमेरिकाबीच पोखरा रंगशालामा जारी फाइनलको निर्धारित समयमा २–२ को बराबरीमा टुंगिएपछि उपाधिको छिनोफानोका लागि खेल अतिरिक्त समयमा गएको हो ।

संकटाले पहिलो हाफमै लिएको २–० को अग्रतालाई जोगाउन नसक्दा खेल अतिरिक्तमा धकेलिएको हो । ३४ औं मिनेट भित्रमै संकटाले २ गोलको अग्रता बनाएको थियो सुरज ज्यू ठकुरीले सातौं मिनेटमा गोल गर्दै संकटालाई अघि बढाएका थिए । मेसुकेले ३४ औं मिनेटमा गोल गर्दै संकटाको अग्रतालाई दोब्बर पारेका थिए ।

त्यसको दुई मिनेट पछि (३६ औं मिनेट) मा रेने सान्टिलोनले गोल गर्दै भुटनिज युथलाई खेलमा फर्काएका थिए । विल्स ग्रिफितले पहिलो हाफको इन्जुरी समयको दोस्रो मिनेटमा हेडमार्फत बराबरी गोल फर्काउँदै खेललाई रोमाञ्चक मोडमा लगेका थिए ।

दोस्रो हाफमा दुई वर्ष अघिको विजेता संकटाले थप गोलको अवसर सृजना गरेर पनि सफल नभएपछि उपाधिको टुंगो लाग्न अझै केहि समय कुुर्नुपर्ने भएको छ । सहारा क्लब पोखराको आयोजित प्रतियोगिताको विजेताले उपाधिसहित १२ लाख र दोस्रो हुने टोलीले ६ लाख रुपैयाँ प्राप्त गर्नेछ ।