विजय नेपाली, पोखरा

संकटा क्लबका कप्तान सुनिल बल आहा रारा पोखरा गोल्डकप फुटबल प्रतियोगिताको सर्वोत्कृष्ट खेलाडी चुनिएका छन् । सहिद स्मारक ए डिभिजन लिगको च्याम्पियन मछिन्द्र एफसी छाडेर यहि सिजन संकटामा आबद्ध भएका सुनिलले फाइनलमा निर्णायक गोल समेत गरेका थिए ।

सुनिलले टेल्जीको इलेक्ट्रिक स्कुटर टाइगर प्राप्त गरे । टेल्जी नेपालका निर्देशक सञ्जिव शिल्पकारले उनलाई स्कुटरको साचो हस्तान्तरण गरेका थिए । पोखरा रंगशालामा भएको फाइनलमा भुटनिज युथ एससी अमेरिकाविरुद्ध निर्धारित समय २–२ को बराबरीमा टुंगिएपनि अतिरिक्त समयमा सुनिलको गोलमा संकटा ३–२ ले विजयी भएको थियो । राष्ट्रिय फुटबल टोलीका सदस्य समेत रहेका सुनिलले थप समयको २७ औं मिनेटमा गोल गरेका थिए ।

व्यक्तिगत अवार्डमा पनि विजेता संकटाकै खेलाडीको दबदबा रह्यो । टिकेन्द्र थापा उत्कृष्ट गोलकिपर, आयुष घलान उत्कृष्ट मिडफिल्डर, स्टेफन बिनोङ उत्कृष्ट फरवार्ड, मेसुके ओलेमोउ उच्चकर्ता र सल्याण खड्की उत्कृष्ट प्रशिक्षक चुनिए । भुटनिज युथका हेक्टर ओर्टेगा उत्कृष्ट रक्षक घोषित भए । धरान एफसी फेयर प्ले टोली चुनियो ।

राष्ट्रिय खेलकुद परिषद्का सदस्य सचिव टंकलाल घिसिङ, अखिल नेपाल फुटबल संघका अध्यक्ष पंकजविक्रम नेम्बाङसहितले विजेता, उपविजेता टोलीका खेलाडी र उत्कृष्ट खेलाडीलाई पुरस्कृत गरे । विजेता संकटाले उपाधिसहित १२ लाख र भुटनिज युथले ६ लाख रुपैयाँ प्राप्त गर्यो । पुस १४ गतेदेखि सुरु भएको प्रतियोगितामा १० टोलीको सहभागिता रहेको थियो ।