एजेन्सी – प्रिमियर लिग प्रतिद्धन्द्धी साउथह्यान्टनसँग स्तब्ध हुँदै म्यानचेस्टर सिटी इएफएल अर्थात कारवाओ कपको क्वाटरफाइनलबाटै बाहिरिएको छ ।

सिटी घरेलु टोली साउथह्याम्टनसँग २–० ले पराजित हुँदै अन्तिम आठबाटै बाहिरिएको हो । सेन्ट मेरिज स्टेडियममा सिटीलाई स्तब्ध पार्न घरेलु टोलीका सेकोउ मारा र मोउसा जनेपोले गोल गरे ।

दुवै गोल पहिलो हाफमा ६ मिनेटको अन्तरमा भएको थियो । खेलको २३औं मिनेटमा सेकोउ माराको गोलबाट साउथह्याम्टनले १–० को अग्रता लिन सफल भएको थियो । उनले लेएन्कोको पासमा गोल गर्न सफल भएका थिए ।

२८औं मिनेटमा मोउसा जनेपोले गोल गर्दै साउथह्याम्टनको अग्रता दोब्बर पारे । उनले रोमियो लाभियाको पासलाई सदुपयोग गरेका थिए ।

दुई गोलले पछि परेको सिटीले त्यसपछि बल पोसेसन राख्दै घरेलु टोलीमाथि लगातार दवाव सिर्जना गरेपनि साउथह्याम्टनले आफ्नो अग्रतालाई जोगाउँदै जित निकाल्न सफल भयो ।

सिटीले दोस्रो हाफमा गोलमेसिन एर्लिङ ब्राउट हालान्ड, केभिन डि ब्रुएना, रोड्री, नाथन एके र म्यानुएल एकान्जीलाई मैदान प्रवेश गराएपनि जित निकाल्न सकेन ।

यस्तै अर्काे खेलमा नटिङहम फरेस्टले वल्भ्सलाइै टाइब्रेकरमा ४–३ ले पराजित गर्दै सेमिफाइनलमा प्रवेश गरेको छ । निर्धारित समयमा १–१ गोलको बराबरीपछि खेल टाइब्रेकरमा पुगेको थियो ।

टाइब्रेकरमा नटिङहमका रेमो फ्रेउलेर, जोई वारल, मोर्गान गिब्स ह्वाइट र ज्याक कोलब्याकले गोल गरे । सोम सुरिजले गोल गर्न सकेनन् । वल्भ्सका ड्यानियल पोडेन्स, म्याथिअस नुनेज र म्याथिअस कुन्हाले गोल गरे । रुवेन नेभेस र जोई हगले गोल गर्न सकेनन् ।

त्यसअघि दि सिटी ग्राउन्ड नटिङहममा बुधबार राति भएको खेलको १८औं मिनेटमा विली बोलीको गोलबाट घरेलु टोलीले १–० को अग्रता लिएको थियो । ६४औं मिनेटमा राहुल जिमिनेजले गोल गर्दै खेललाई १–१ गोलको बराबरीमा ल्याए ।

यसअघि म्यानचेस्टर युनाइटेड र न्यूक्यासल युनाइटेडले अन्तिम चारमा स्थान पक्का गरिसकेको छ ।