एजेन्सी – यो सिजन खराव लयमा रहेको लन्डन क्लब चेल्सीले इंग्लिस प्रिमियर लिगमा फुलहमसँग हार बेहोरेको छ । वेस्ट लन्डन डर्वीको खेलमा चेल्सी घरेलु टोली फुलहमसँग २–१ ले पराजित भएको हो ।

घरेलु मैदानमा फुलहमको जितमा चेल्सीकै पुर्व मिडफिल्डर विलियम र भिनिसियसले गोल गरे । चेल्सीका कालिडोउ कोउलीवालीले एक गोल फर्काए ।

क्राभेन कटेज लन्डनमा बिहीबार राति भएको खेलको २५औं मिनेटमा विलियनले गोल गर्दै फुलहमलाई पहिलो हाफमा १–० को अग्रता दिलाए । उनको पेनाल्टी बक्सभित्रबाट गरेको प्रहार टिभोह चलोवाहलाई डिफ्लेक्ट हुँदै सुन्दर गोलमा परिणत भएको थियो ।

४७औं मिनेटमा कालिडोउ कोउलीवलीले गोल गर्दै खेललाई १–१ गोलको बराबरीमा ल्याए । मासन माउन्टको फ्रिकिक रिवाउन्ड हुँदा कालिडोउ कोउलीवलीले हुलमुलमा गरेको प्रहारले पोस्टको दिशा लिएको थियो ।

५८औंं मिनेटमा चेल्सी १० खेलाडीमा समेटिन पुग्यो । यसै साता स्पेनिस क्लब एट्लेटिको मड्रिडबाट लोनमा चेल्सी आएका पोर्चुगिज फरवार्ड जोआओ फेलिक्स आफ्नो डेब्यु खेलमै रातो कार्ड खाँदै मैदानबाट बाहिरिए । बल खोस्नेक्रममा टिटेमाथि च्यालेन्ज गरेपछि रेफ्री डेभिड कोटले उनलाई सिधै रातो कार्ड देखाउँदै मैदान बाहिर पठाए ।

त्यसपछि ७३औं मिनेटमा भिनिसियसले गोल गर्दै चेल्सीलाई २–१ ले स्तब्ध पारे । उनले एन्ड्रिएस पेरेइराको पासलाई गोल गर्न सफल भएका थिए ।

यस जितले फुलहम १९ खेलबाट ३१ अंक जोडेर छैटौं स्थानमा उक्लिएको छ । पराजित चेल्सी १८ खेलबाट २५ अंक जोडेर १०औं स्थानमा रहेको छ । लगातारको हारले चेल्सीको शीर्ष चारको सम्भावना कमजोर बन्दै गएको छ ।