काठमाडौं (हाम्रो खेलकुद) – नेपाल र भारतको राष्ट्रिय महिला फुटबल टोलीबीच फागुनमा मैत्रीपूर्ण खेल हुने भएको छ । अखिल नेपाल फुटबल संघ (एन्फा) कार्यसमितिको आकष्मिक बैठकले महिला राष्ट्रिय फुटबल टोलीलाई मैत्रीपूर्ण खेलका लागि गरेको प्रस्तावलाई स्वीकार गर्ने निर्णयसँगै खेल तय भएको छ ।

एन्फाका अनुसार फागुन १ देखि १३ गते सम्म मैत्रीपूर्ण खेलका लागि अखिल भारतीय फुटबल महासंघले एन्फालाई प्रस्ताव गरेको थियो । त्यसलाई स्वीकार गर्ने निर्णय गरेको एन्फा प्रवक्ता सुरेश शाहले शुक्रबार जारी विज्ञप्तीमा उल्लेख छ । तर, नेपाल र भारतबीच कति खेल खेलिने भन्ने विषयमा जानकारी गराइएको छैन ।

एन्फाको पछिल्लो निर्णयसँगै नेपाल र भारतको महिला टोलीबीच ६ महिनामा भेट हुने भएको छ । यसअघि काठमाडौंको दशरथ रंगशालामा भएको साफ च्याम्पियनसिपमा यी दुर्य टोलीको भेट भएको थियो । जसमा नेपालले भारतलाई १–० ले पराजित गरेको थियो । रश्मीकुमार घिसिङको गोलमा नेपाल विजयी भएको थियो ।

महिला राष्ट्रिय टोली अहिले मुख्य प्रशिक्षक विहिन छ । साफ च्याम्पियनसिपमा कुमार थापा महिला टोलीको मुख्य प्रशिक्षक थिए । साफमा नेपाल फाइनलमा बंगलादेशसँग पराजित भएको थियो ।