एजेन्सी – युभेन्ट्सले इटालियन सिरी ‘ए’ को शीर्षस्थानमा रहेको नेपोलीसँग लज्जास्पद हार बेहोरेको छ । युभेन्ट्सले घरेलु टोली नेपोलीसँग ५–१ को लज्जास्पद हार बेहोरेको हो ।

नेपोलीको फराकिलो जितमा भिक्टर ओसिमहेनले दुई तथा खभिचा कभारचकेलिया, एमिर रहमानी र इल्जिफ इल्मासले समान एक गोल गरे । युभेन्ट्सका एन्जल डि मारियाले एक गोल फर्काए ।

स्टेडियो डिएगो अर्मान्डो म्याराडोनामा शुक्रबार राति भएको एकपक्षीय खेलको १४औं मिनेटमा ओसिमहेनको गोलबाट नेपोलीले अग्रता लिएको थियो । ३९औं मिनेटमा खभिचा कभारचकेलियाले भिक्टरको पासमा गोल गर्दै नेपोलीको अग्रता दोब्बर पारे ।

४२औं मिनेटमा डि मारियाले गोल गर्दै खेललाई पहिलो हाफमा २–१ को स्थितिमा ल्याए । दोस्रो हाफ नेपोलीकै पक्षमा रह्यो । ५५औं मिनेटमा खभिचा कभारचकेलियाको पासमा एमिर रहमानीले गोल गर्दै नेपोलीलाई खेलमा ३–१ ले अघि बढाए ।

६५औं मिनेटमा ओसिमहेनले खभिचा कभारचकेलियाको पासमा व्यक्तिगत दोस्रो तथा टोलीका लागि चौथो गोल गर्दै नेपोलीलाई सहज जिततर्फ अघि बढाए । ७२औं मिनेटमा इल्जिफ इल्मासले जियोभानी डि लोरेन्जोको पासमा गोल गर्दै युभेन्ट्सलाई ५–१ को नमिठो हार चखाए ।

यस जितसँगै नेपोलीले शीर्षस्थानमा १० अंकको अग्रता कायम गरेको छ । नेपोलीको १८ खेलबाट ४७ अंक पुगेको छ । एक खेल कम खेलेको एसी मिलानको २७ अंक छ । पराजित युभेन्ट्सले दोस्रो स्थानमा उक्लने मौका गुमाएको छ । युभेन्ट्सको १८ खेलबाट ३७ अंक छ ।