एजेन्सी – इंग्लिस प्रिमियर लिग अन्तर्गत विहीबार राती म्यानचेस्टर सिटीले टोटेनहम हट्सपरमाथि रोमान्चक जित दर्ता गरेको छ । पहिलो हाफमा २-० ले पछि परेको सिटी उत्कृष्ट पुनरागमन गर्दै ४-२ ले विजयी भयो ।

इतिहाद रंगशालामा पहिलो हाफको अन्त्यतिर टोटेनहमले लगातार दुई गोलका साथ अग्रता लिएको थियो । ४४ अ‍ौं मिनेटमा डेजान कुलुसेभ्सकीले पेनाल्टी क्षेत्र भित्र कमजोर डिफेन्सको फाइदा उठाउँदै गोल गरे । लगत्तै इन्ज्युरी समयमा एक्सन रोयलले रिबाउन्डमा आएको बललाई गोलमा परिणत गरे ।

दोस्रो हाफको सुरुवातमै सिटीले लगातार दुई गोलका साथ खेल बराबरीमा ल्यायो ‌‌। ५१ अ‍ौें मिनेटमा जुलियन अल्भारेजले पेनाल्टी क्षेत्र भित्र भिडभाडमा गोल गरे । लगत्तै एर्लिङ हालान्डले हेडरमार्फत बराबरी गोल फर्काए ।

रियाद माहरेजले ६३ अ‍ौं मिनेटमा गोल गर्दै सिटीलाई अघि बढाए । उनले रोड्रीको पासमा पेनाल्टी क्षेत्र भित्रबाट सुन्दर फिनिस गरे । खेलको अन्तिम मिनेटमा डिफेन्सको गल्तीमा माहरेजले व्यक्तिगत दोस्रो गोल गर्दै जित पक्का गरे ।

यस जितसँगै सिटीले शीर्षस्थानको आर्सनलसँग ५ अंकको दुरी कायम गरेको छ । आर्सनलको १८ खेलमा ४७ अंक तथा सिटीको १९ खेलमा ४२ अंक छ । टोटेनहम २० खेलमा ३३ अंकसहित पाँचौ स्थानमा छ ।