एजेन्सी – स्पेनिस कोपा डेल रे को सेमिफाइनलमा दुई महारथी रियल म्याड्रिड र बार्सिलोना भिड्ने भएका छन् । सोमबार सार्वजनिक गरिएको खेल तालिका अनुसार उपाधिका दावेदार दुई टोली फाइनलअघि नै भिड्ने भएका हुन् ।
प्रतियोगिताको अर्को सेमिफाइनलमा ओसासुना र एथ्लेटिक बिल्बाओ खेल्नेछन् । रियलले पहिलो खेल घरेलु मैदानमा खेल्नेछ । पहिलो लेग मार्च पहिलो साता हुँदा दोस्रो लेग अप्रिलको पहिलो सातामा हुनेछ । यसबीचमा दुई टोलीले १९ मार्चमा क्याम्प नोउमा ला लिगाको खेल खेल्नेछन् ।
त्यस्तै ओसासुनाले पनि पहिलो लेगमा बिल्बाओलाई आमन्त्रण गर्नेछ । यो खेल फेब्रुअरी दोस्रो साता पहिलो लेग र मार्च पहिलो सातामा दोस्रो लेग हुनेछ । फाइनलमा पुग्ने टोलीले सन् २०२४ को सुपर कपमा पनि स्थान पक्का गर्नेछ ।
हालसम्म रियल र बार्सिलोनाले कपमा ३५ पटक खेलेका छन् । बार्सिलोनाले १५ खेल जित्दा रियलले १२ खेलमा जित हासिल गरेको छ । ८ खेल बराबरीमा सकिएको थियो ।
