लमजुङ (हाम्रो खेलकुद) – गन्नी एफसी पोखराले चौथो सुन्दर बजार कप सेभेन ‘ए’ साइड फुटबल प्रतियोगिताको उपाधि जितेको छ ।
गन्नीले एक गोलले पछि परेको स्थिति उल्ट्याएर साविक विजेता नाइन स्टार क्लब सुन्दरबजारलाई ३–१ ले पराजित गर्दै उपाधि जित्न सफल भएको हो ।
लमजुङको सुन्दरबजार नगरपालिकास्थित कृषि क्याम्पस ग्राउण्डमा सोमबार भएको गन्नीलाई उपाधि जिताउन सन्जिव रानाले दुई तथा युनिक तामाङले एक गोल गरे । नाइन स्टारका सन्तोष गुरुङको गोल सान्त्वना बन्यो ।
सन्तोष गुरुङको गोलबाट नाइट स्टारले अग्रता लिएको थियो । युनिक तामाङले गोल गर्दै खेललाई १–१ गोलको बराबरीमा ल्याए । त्यसपछि सन्जिव रानाले दुई गोल गर्दै गन्नीको जित पक्का गरे ।
उपाधिसँगै गन्नीले २ लाख रुपैयाँसँगै शिल्ड प्राप्त गरेको छ । उपविजेता बनेको नाइन स्टारले १ लाख रुपैयाँ हात पारेको छ । उत्कृष्ट टोली बन्दै सिन्दुरे एफसीले १० हजार रुपैयाँ प्राप्त गरेको क्लबका सदस्य सुजन राना मगरले जानकारी गराए ।
गन्नी एफसीका युनिक तामाङ सर्वाेत्कृष्ट खेलाडी तथा नाइन स्टारका इन्द्र दुरा सर्वाधिक गोलकर्ता भए । उनीहरुले समान ५ हजार रुपैयाँ हात पारे ।
विजयी टोली तथा खेलाडीलाई सुन्दरबजार नगरपालिकाका मेयर कृष्ण प्रसाद कोइराला र क्लबका पदाधिकारीलगायतले पुरस्कृत गरे ।
सहिद दिवसको अवसरमा सुन्दरबजार युवा क्लबले आयोजना गरेको सेभेन ‘ए’ साइड खुल्ला फुटबल प्रतियोगिता माघ १० गतेबाट शुरु भएको थियो ।
नकआउटको आधारमा भएको प्रतियोगितामा विभिन्न २४ टोलीको सहभागिता रहेको थियो । पहिलो संस्करणमा सिदार्थ युवा क्लब खहरे सुन्दरबजार, दोस्रोमा आदर्श युवा क्लब बेशीशहर र तेस्रोमा नाइन स्टारले उपाधि जितेको थियो ।
