काठमाडौं (हाम्रो खेलकुद) – नेपाली पुरुष राष्ट्रिय फुटबल टोलीका भरपर्दा मिडफिल्डर विशाल राई पनि अष्ट्रेलिया प्रस्थान गरेका छन् ।
मिडफिल्डर विशाल अष्ट्रेलिया प्रस्थान गरेको सहिद स्मारक ‘ए’ डिभिजन लिग च्याम्पियन मछिन्द्र फुटबल क्लबका व्यवस्थापक अनिल श्रेष्ठले सामाजिक सन्जाल फेसबुकबाट जानकारी दिएका छन् ।
उनलाई त्रिभुवन अन्तर्राष्ट्रिय विमानस्थलमा मछिन्द्रका खेलाडीसहितको टोलीले शुक्रबार बिहान बिदाई गरेका छन् । पछिल्लो समय नेपाली फुटबल खेलाडीको गन्तव्य अष्ट्रेलिया बनेको छ । यस वर्ष नै ३० भन्दा बढी खेलाडी अष्ट्रेलियासँगै न्युजिल्याण्ड र दुवई पुगिसकेका छन् ।
२९ वर्षीय विशालले घरेलु लिगमा मछिन्द्र फुटबल क्लबबाट व्यवसायिक खेल खेलिरहेका थिए । उनले मनाङ–मर्स्याङ्दी क्लबबाट पनि लामो समय व्यवसायिक खेल खेले । उनले मछिन्द्रसँगै मनाङबाट लिग जितेका छन् । उनले धनगढी एफसीबाट नेपाल सुपर लिग खेलेका थिए ।
उमेर समूह यू–१४, यू–१६ र यू–१९ हुँदै विशालले सन् २०१५ अगस्ट ३१ मा भारतसँगको मैत्रीपूर्ण खेलबाट नेपालको सिनियर टोलीमा डेब्यु गरेका थिए । त्यसयता उनले नेपालको लागि ३३ खेलमा ५ अन्तर्राष्ट्रिय गोल गरेका छन् ।
