एजेन्सी – इंग्लिस प्रिमियर लिगमा लन्डन क्लब चेल्सी घरेलु मैदानमा फुलहमसँग बराबरीमा रोकिएको छ । चेल्सी फुलहमसँग गोलरहित बराबरीमा रोकिएको हो ।
स्टामफोर्ड ब्रिजमा शुक्रबार राति भएको खेलमा चेल्सीले इंग्ल्यान्डको कीर्तिमानी मुल्यमा क्लबमा अनुबन्ध गरेको अर्जेन्टिनी युवा मिडफिल्डर एन्जो फर्नान्डेजलाई पहिलो रोजाईमा खेलाएपनि टोलीले सफलता हात पार्न सकेन । एन्जोले चेल्सीमा आफ्नो पहिलो खेलमै प्रभावकारी प्रदर्शन गरेपनि जितको स्वाद चाख्न पाएनन् ।
२०औं मिनेटमा थियागो सिल्भाको पासमा काई हाभर्टजको प्रहारलाई फुलहमका गोलरक्षक बर्न लेनोले विफल पारे । २५औं मिनेटमा फुलहमका एन्ड्रिएस पेरेइराको प्रहारलाई चेल्सीका गोलरक्षक किपा एरिजावालागाले विफल पारे ।
३०औं मिनेटमा एन्जोको पासमा मासन माउन्टको क्रस टिम रिमलाई डिफ्लेक्ट हुँदै गएको बललाई काई हाभर्टजले भेट्न सकेन । ४४औं मिनेटमा हाभर्टज नै चुके । ७२औं मिनेटमा एन्जोले सुवर्ण अवसर खेर फाले ।
८०औं मिनेटमा कोनोर गल्लाघेरको प्रहारलाई टिम रिमले गोललाईनबाट बचाउँदै चेल्सीको अग्रता टारिदिए । पाहुना टोलीमाथि ६७ प्रतिशत बल पोसेसन राखेपनि फिनिसिङ गर्न नसक्दा खेल बराबरीमा सकियो ।
यस बराबरीसँगै चेल्सी २१ खेलबाट ३० अंक जोडेर नवौं स्थानमा रहेको छ । फुलहम २२ खेलबाट ३२ अंक जोडेर छैटौं स्थानमा छ ।
