एजेन्सी – सन डाइसको प्रशिक्षणको पहिलो खेलमा नै एभर्टनले शीर्षस्थानमा रहेको आर्सनललाई स्तब्ध पारेको छ । आर्सनल घरेलु टोली एभर्टनसँग १–० ले स्तब्ध बनेको हो ।

घरेलु मैदानमा एभर्टनको जितमा दोस्रो हाफमा जेम्स तार्काेवस्कीले गरेको गोल नै निर्णायक बन्यो । गुडिसन पार्कमा शनिबार राति भएको खेलमा एक गोलले पछि परेपछि आर्सनलले घरेलु टोलीविरुद्ध बल पोसेसन राख्दै लगातार दवाव सिर्जना गरेपनि एभर्टनको बलियो रक्षापङ्ति तोड्न नुक्दा पराजित हुन पुग्यो ।

१२औं मिनेटमा थोमस पार्टेको प्रहारलाई एभर्टनका गोलरक्षक जोर्डन पिकफोर्डले दोस्रो प्रयासमा बचाउन सफल भए । २२औं मिनेटमा जेम्स तार्काेवस्कीको हेडरलाई विलियम सालिवाले ब्लक गर्दै एभर्टनको अग्रता टारे । ३०औं मिनेटमा इडवार्ड एनकेइटाको प्रहालाई पिकफोर्डले पुनः विफल पारे ।

पहिलो हाफको इन्ज्युरी समयमा डोमिनिक काल्भर्ट लेविनले सुवर्ण अवसर चुकाए । ६०औं मिनेटमा जेम्स तार्काेवस्कीले गोल गर्दै एभर्टनलाई १–० को अग्रता दिलाए । ड्वाइट म्याक्निलको पासमा गोल गर्न सफल भएका थिए । त्यसपछि आर्सनलले लगातार दवाव बढाएपनि एभर्टनले अग्रता जोगाउँदै महत्वपूर्ण ३ अंक बटुल्न सफल भयो ।

एभर्टनले २२ अक्टोवर २०२२ मा क्रिस्टल प्यालेसलाई ३–० ले पराजित गरेपछि ११औं खेलमा जित निकालेको हो । यस बीचमा एभर्टनले २ बराबरी र ८ हारको नतिजा निकालेको थियो ।

२१ जनवरी २०२२ मा वेस्ट ह्याम युनाइेडसँग २–० ले पराजित भएपछि एभर्टनले फ्रान्क लाम्पार्डलाई बर्खास्त गर्दै सन डाइसलाई टोलीको मुख्य प्रशिक्षकमा नियुक्त गरेको थियो । उनले आफ्नो प्रशिक्षणपछिको पहिलो खेलमा नै टोलीलाई जित दिलाए ।

यस जितसँगै एभर्टन २१ खेलबाट १८ अंक जोडेर १७औं स्थानमा उक्लिएको छ । पराजित आर्सनलले शीर्षस्थानमा आफ्नो अग्रता बढाउने अवसर गुमाएको छ । आर्सनलको २० खेलबाट ५० अंक छ ।

प्रिमियर लिगमा आर्सनलको यो दोस्रो हार हो । यसअघि आर्सनलले गत सेप्टेम्वर २०२२ मा म्यानचेस्टर युनाइटेडसँग ३–१ को हार बेहोरेको थियो । आर्सनलले यो सिजन २० खेलमा १६ जित र समान २ बराबरी र हारको नतिजा निकालेको छ ।