एजेन्सी – ब्राजिली मिडफिल्डर क्यासमिरोले रातो कार्ड खाएको खेलमा म्यानचेस्टर युनाइटेडले इंग्लिस प्रिमियर लिगमा जित निकालेको छ ।

युनाइटेडले घरेलु मैदानमा क्रिस्टल प्यालेसलाई २–१ ले पराजित गरेको हो । युनाइटेडको जितमा ब्रुनो फर्नान्डेस र मार्कस रासफर्डले गोल गरे । क्रिस्टल प्यालेसका जेफ्रेले एक गोल फर्काए ।

ओल्ड ट्राफोर्डमा शनिबार राति भएको खेलको सातौं मिनेटमा नै ब्रुनो फर्नान्डेसको पेनाल्टी गोलबाट युनाइटेडले पहिलो हाफमा १–० को अग्रता लिन सफल भएको थियो ।

मार्कस रासफर्डले गरेको क्रसलाई क्लियर गर्ने क्रममा विल ह्युगले हातले बल छुन पुगेपछि रेफ्रीले भिएआरको सहायता लिदै युनाइटेडलाई पेनाल्टी प्रदान गर्द ब्रुनो चुकेनन् ।

६३औं मिनेटमा रासफर्डले गोल गर्दै युनाइटेडको अग्रता दोब्बर पारे । उनले लुका साको पासमा गोल गर्न सफल भएका थिए । ७०औं मिनेटमा युनाइटेड १० खेलाडीमा समेटिन पुग्यो । ह्युगले प्रहार गर्ने क्रममा क्यासमिरोले अनावश्यक फउल गरेपछि रेफ्रीले भिएआरको सहायता लिदै उनलाई मैदान बाहिर पठाए ।

७६औं मिनेटमा जेफ्रेले गोल गर्दै खेललाई २–१ को स्थितिमा ल्याए । उनले चेक ओमर डोउकाउरेको पासमा गोल गर्न सफल भएका थिए । त्यसपछि थप गोल निस्कन नसक्दा युनाइटेड विजयी हुन सफल भयो ।

यस जितसँगै युनाइटेड २१ खेलबाट ४२ अंक जोडेर तेस्रो स्थानमा रहेको छ । पराजित क्रिस्टल प्यालेस २१ खेलबाट २४ अंक जोडेर १२औं स्थानमा छ ।