काठमाडौं (हाम्रो खेलकुद)– नेपाली टोली बंगलादेशमा जारी साफ यू २० महिला च्याम्पियनसिपको फाइनलमा पुगेको छ । राउन्ड रोविनको आफ्नो अन्तिम खेलमा मंगलबार भारतमाथि ३–१ को सानदार जित निकाल्दै नेपाल फाइनलमा पुग्न सफल भएको हो ।

ढाकास्थित वीर श्रेष्ठ सहिद मुस्तफा स्टेडियममा १–० ले पछि परेको खेल उल्टाउँदै नेपालले अन्तिम दुईको यात्रा तय गरेको हो । फाइनल पुग्ने अर्को टोलीको टुंगो आजै हुने राउन्ड रोविनको अन्तिम खेलबाट लाग्नेछ । जसमा आयोजक बंगलादेश र भुटानबीच प्रतिस्पर्धा हुनेछ ।

भारतका लागि २१ औं मिनेटमा अपूर्णा नार्जरीले गोल गर्दै अग्रता दिलाएकी थिइन् । ४८ औं मिनेटमा अन्जली चन्दले नेपालका लागि बराबरी गोल गरेकी थिइन् । कप्तान प्रिति राईले ६९ औं मिनेटमा गोल गरेपछि नेपाल २–१ ले अगाडि लागेको थियो । ८९ औं मिनेटमा अमिशा कार्कीले गोल गर्दै नेपालको जित पक्का गरेकी थिइन् । प्रतियोगितामा अमिशाको ४ र प्रितीको २ गोल पुगेको छ । अमिशाले भुटानविरुद्ध ह्याट्रिक गर्दा अर्को गोल प्रितिले गरेकी थिइन् ।

आज भुटानलाई हराए वा बराबरमिा रोकिएपनि बंगलादेश अन्तिम दुईमा पुग्नेछ । बंगलादेश पराजित भएको खण्डमा भने भारत अन्तिम दुईमा पुग्नेछ । ३ खेलपछि नेपालको ६ अंक पुगेको छ । भारत र एक खेल कम खेलेको बंगलादेशको समान ४ अंक छ । भुटान अंक विहिन छ ।

नेपालले ३ खेलमा दुई जित र एक खेलमा हार बेहोरेको छ । भारतले ३ खेलमा १ जित, १ बराबर र १ खेलमा हार बेहोरेको छ । बंगलादेशले २ खेलमा १ जित र १ बराबरी खेलेको छ । भुटानले दुवै खेल गुमाएको थियो । पहिलो खेलमा बंगलादेशसँग ३–१ ले पराजित भएको नेपालले दोस्रो खेलमा भुटानलाई ४–० ले हराएको थियो । भुटानलाई पहिलो खेलमा १२–० ले हराउको भारत बंगलादेशसँग गोलरहित बराबरीमा रोकिएको थियो ।