काठमाडौं (हाम्रो खेलकुद)– अर्को महिना आयोजना हुने विराट गोल्डकप फुटबल प्रतियोगिताको तयारी तीब्र पारिएको आयोजक विराट गोल्डकप ट्रष्टले जनाएको छ ।
विराटनगर महानगरपालिकाका मेयर नागेश कोइराला संरक्षक रहेको विराट गोल्ड कप शहि रंगशालामा चैत ९ गतेदेखि सुरु हुनेछ । फल्र्ड लाइटमा खेलाइने प्रतियोगितामा ८ टोलीको सहभागिता रहने बताइएको छ । नेपाली र विदेशी टिमको सहभागीतामा हुने प्रतियोगिताको पुरस्कार राशी पनि बढाउने तयारी भइरहेको विराट गोल्डकप प्रतियोगिताका सिईओ (कार्यकारी निर्देशक) सुवाशीश कोइरालाले जानकारी दिए ।
प्रतियोगिता सम्पन्न गर्नका लागि झण्डै २ करोड ५० लाख खर्च हुने अनुमान गरिएको छ । प्रतियोगितामा घरेलु टोलीको रुपमा विराटनगर सिटी एफसी रहेको छ । विराटनगर सिटी एफसीले पहिलो संस्करणको नेपाल सुपर लिग (एनएसएल) खेलेको थियो ।
ए डिभजन टोली संकटा क्लब , नेपाल पुलिस क्लब , त्रिभुवन आर्मी क्लब, मच्छिन्द्र एफसी र थ्रीस्टार क्लबले खेल्ने पक्का भइसकेको आयोजकले जनाएको छ । २ वटा विदेशी टोलीलाई समावेश गराउने गरि तयारी भइसकेको इभेन्ट म्यानेजर सरोज लम्सालले बताए ।
प्रतियोगिताका लागि अहिले विराटनगरको शहिद रंगशाला मर्मतको काम भइरहेको बताइएको छ । पूर्वमा फुटबलको संस्कृति विकासका लागि पनि यो प्रतियोगिता कोषे ढुंगा सावित गर्ने उद्देश्यले सवै तयारी अगाडि बढाइएको लम्सालले बताए ।
सुरुमा चैत ६ गतेदेखि प्रतियोगिता आयोजना गर्ने गरी आयोजकले तयारी अघि बढाए पनि अखिल नेपाल फुटबल संघ (एन्फा) ले ए डिभिजन लिग आयोजना गर्न लागेकोले ३ दिन पर सरेको हो । एन्फाले पनि मोफसलमा हुने गोल्डकपहरुको क्यालेन्डर सार्वजनिक गरिसकेको छ । सोही अनुरुप विराट गोल्डकप चैत १७ गतेसम्म सन्चालन हुनेछ ।
