काठमाडौं (हाम्रो खेलकुद) – नेपाली राष्ट्रिय यु२० महिला टोलीले साफ यु२० च्याम्पियनसिपको फाइनलमा बंगलादेशसँग हार बेहोरेको छ । बंगलादेशले तेस्रो पटक च्याम्पियन बन्ने क्रममा नेपाललाई ३-० ले पराजित गर्यो ।

खेलको पहिलो हाफमा २-० ले पछि परेको नेपालले दोस्रो हाफमा पुनरागमन गर्न सकेन । हजारौंको संख्यामा रंगशाला आएका घरेलु समर्थकमाझ बंगलादेशले उत्कृष्ट प्रदर्शन गरेको थियो । लिग चरणमा भारतमाथि पुनरागमन जित शासिल गरेको नेपालले फाइनलमा भने त्यसलाई दोहोर्याउन सकेन ।

राउन्ड रोविनका आधारमा भएको च्याम्पियनसिपमा शीर्ष २ टोलीबीच फाइनल भिडन्त भएको थियो । बंगलादेश अपराजित रहँदै फाइनलमा पुगेको हो भने नेपालले ३ मध्ये २ खेलमा जित र १ खेलमा हार बेहोरेको थियो ।

पहिलो खेलमा नै नेपाल बंगलादेशसँग ३–१ ले पराजित भएको थियो । त्यसपछिका खेलमा नेपालले भुटानलाई ४–० र भारतलाई ३–१ ले हराएको थियो । भारतसँग गोलरहित बराबर खेलेको बंगलादेशले भुटानमाथि ५–० को जित निकालेको थियो ।

बंगलादेशले पछिल्लो समय फुटबलमा उच्च प्रदर्शन गरिएको छ । झण्डै ६ महिना अघि काठमाडौंको दशरथ रंगशालामा भएको सिनियर साफ महिला च्याम्पिनसिपमा नेपाललाई हराउँदै बंगलादेश पहिलो पटक च्याम्पियन बनेको थियो । उमेर समूहमा भने महिला च्याम्पियनसिप यसपटक यू २० को भइरहेको छ । यसअघि यू १९ र पहिलो र तेस्रो संस्करण यू १८ को भएको थियो ।

सन् २०१८ मा भुटानमा भएको पहिलो संस्करणमा फाइनल पुगेको नेपाल त्यति बेला पनि बंगलादेशसँग १–० ले पराजित भएको थियो । दुई वर्षअघि बंगलादेशमा भएको राउन्ड रोविनका आधारमा भएको यू १९ च्याम्पियनसिपमा नेपाल तेस्रो भएको थियो । गत वर्ष यू १८ का रुपमा च्याम्पियनसिप हुँदा पनि नेपाल तेस्रो भएको थियो ।