दिक्षान्स खड्का, हेटौंडा

वडा नम्बर ३ र ७ मकवानपुरको बकैया गाउँपालिकामा जारी चौंथो गाउँपालिकास्तरिय फुटबल प्रतियोगिताको उपाधिका लागि भिड्ने भएका छन् । बिहीबार भएको पहिलो सेमिफाइनल वडा नम्बर ३ ले वडा नम्बर ६ लाई ४–० र वडा नं.७ ले वडा नं. ८ लाई २–१ ले हराउँदै एकअर्कासँगको फाइनल भेट पक्का गरेका थिए ।

साविक विजेता समेत रहेको वडा नं ३ लाई जित दिलाउन आयुष नेगीले १, कप्तान छेवाङ लामा र रोमन घलानले समान १ गोल गरे । म्यान अफ दी म्याच विजयी टोलीका आयुषले १ हजार ५ सय रुपैयाँ प्राप्त गरे । वडा नं. ७ का लागि समीर राई र विकास लोप्चनले समान १ गोल गरे । पराजित टोलीका लागि विशाल घलानले गोल गरे । पराजित टोलीका विशाल म्यान अफ दी म्याच घोषित भए र उनले १ हजार ५ सय रुपैयाँ प्राप्त गरे ।

फाइनल शुक्रबार हुनेछ । वडा नं ३ सबै संस्करणको फाइनल पुगेपछि सुरुवाती दुई संस्करणमा उपविजेता बनेको थियो । फाइनल अघि गाउँपालिकाका जनप्रतिनिधि र कर्मचारीबीच मैत्रीपूर्ण फुटबल हुने प्रतियोगिताका संयोजक विजय लामा थिङले जानकारी दिए ।

प्रतियोगिताको विजेताले उपाधिसहित १ लाख ५० हजार र दोस्रो हुने टोलीले १ लाख रुपैयाँ प्राप्त गर्नेछ । प्रतियोगिताको सर्वोत्कृष्ट खेलाडीले १० हजार तथा विद्यागत उत्कृष्ट हुने खेलाडीले जनही ५ हजार रुपैयाँ प्राप्त गर्नेछन् ।