काठमाडौं (हाम्रो खेलकुद) – अखिल नेपाल फुटबल संघ (एन्फा) ले नेपाली महिला राष्ट्रिय फुटबल टोलीको सहायक प्रशिक्षकमा पारस चौधरीलाई नियुक्त गरेका छन् ।

एन्फाले भारतसँगको दुई मैत्रीपूर्ण खेलका लागि चौधरीलाई सहायक प्रशिक्षकको जिम्मेवारी प्रदान गरेको हो । उनलाई एन्फाका महासचिव किरण राईले शुक्रबार नियुक्ति पत्र प्रदान गरे ।

भारतसँगको दुई मैत्रीपूर्ण खेलका लागि एन्फाले अनन्त राज थापालाई मुख्य प्रशिक्षक नियुक्त गरिसकेको छ । उनले विगत दुई सातादेखि टोलीलाई प्रशिक्षण गराइरहेको छ ।

प्रशिक्षक थापाले शुक्रबारै ३३ सदस्यीय टोलीबाट १० खेलाडीलाई बाहिर राख्दै २३ सदस्यीय टोली घोषणा गरेका छन् । चोटका कारण साफ महिला च्याम्पियनसिप गुमाएकी कप्तान रेनुका नगरकोटे टोलीमा फर्कंदा साफको टोलीमा रहेकी मन्जली योृन्जन भने अन्तिम छनोटमा पर्न सकिनन् । प्रशिक्षक थापाले नेपाल पुलिस क्लबका निर्मला विक र घिम कुमारी गुरुङलाई राष्ट्रिय टोलीमा पुनरागमनको अवसर दिएका छन् । युवा खेलाडी सविता रानामगरले पनि टोलीमा पुनरागमन गरेकी छिन् ।

गोलरक्षक सपना राई, डिफेन्डरहरु अन्जली वाइबा, सिर्जना चेम्जोङ र गंगा गुरुङ अन्तिम टोलीमा परेनन् । मन्जलीसँगै मिडफिल्डर दिपा न्यौपाने, सरस्वती ऐर र सरस्वती हमाल अन्तिम टोलीमा नरहँदा फरवार्डद्वय चन्द्रा भण्डारी र रजनी थोकर पनि बाहिरिएका छन् ।

नेपालले फेब्रुअरी १५ र १८ तारिखमा भारतको चेन्नईमा दुई मैत्रीपूर्ण खेल खेल्नेछ । भारतविरुद्ध दुई खेल खेल्ने नेपाली टोली १३ तारिख सोमबार त्यसतर्फ प्रस्थान गर्नेछ ।

अन्तिम टोली :

गोलरक्षक (३) – एन्जिला तुम्बापो सुब्बा, अन्जना राना मगर र उषा नाथ

डिफेन्डर (७) – हिरा कुमारी भुजेल, घिम कुमारी गुरुङ, अमृता जैशी, गीता राना, निशा थोकर, विमला विक र समिक्षा घिमिरे

मिडफिल्डर (८) – विमला चौधरी, सविता राना मगर, सरु लिम्बु, दिपा शाही, रेनुका नगरकोटे, अनिता बस्नेत, प्रिती राई र अनिता केसी

फरवार्ड (५) – अमिषा कार्की, रेखा पौडेल, सावित्रा भण्डारी, रश्मी कुमारी घिसिङ, निर्मला विक

दोस्रो चरणबाट बाहिरिएका खेलाडी :

सपना राई, अन्जली वाइबा, सिर्जना चेम्जोङ, दिपा न्यौपाने, सरस्वती ऐर, सरस्वती हमाल, चन्द्रा भण्डारी, मन्जली कुमारी योन्जन, गंगा गुरुङ र रजनी थोकर