काठमाडौं (हाम्रो खेलकुद)– अर्को साता सुरु हुने केपी ओली कप फुटबल प्रतियोगितामा भाग लिने अधिकांश टोली ए डिभिजनका क्लब रहेका छन् । आयोजक केपी ओली फुटबल क्लबबाहेक ७ वटा ए डिभिजन क्लबले केपी ओली कपको उपाधिका लागि भिड्ने भएका छन् ।

आयोजकले आइतबार पत्रकार सम्मेलनमार्फत खेल तालिका सार्वजनिक गरेको छ । फागुन ११ गते हुने उद्घाटन खेल नेपाल पुलिस क्लब र सातदोबाटो युथ क्लबबीच प्रतिस्पर्धा हुनेछ । खेल दिउँसो ३:०० बजे सुरु हुनेछ । फाइनलबाहेकका सबै खेल सातदोबाटोस्थित एन्फा कम्प्लेक्समा हुने बताइएको छ। फाइनल फागुन १७ गते दशरथ रंगशालामा हुने आयोजकले जनाएको छ ।

दोस्रो दिन फागुन १२ गते दुई खेल हुनेछन् । पहिलो खेल ११:०० बजे त्रिभुवन आर्मी क्लब र एनआरटीबीच हुनेछ । सोही दिन मछिन्द्र र चर्च ब्वाइज युनाइटेडबीच प्रतिस्पर्धा गर्नेछन् । फागुन १३ गते केपी ओली एफसी र जावलाखेलबीचको खेल दिउँसो ३:०० बजे सुरु हुनेछ । पहिलो सेमिफाइनल फागुन १४ गते र दोस्रो सेमिफाइनल फागुन १५ गते हुनेछ ।

प्रतियोगिताको विजेताले उपाधिसहित १० लाख र दोस्रो हुने टोलीले ५ लाख रुपैयाँ प्राप्त गर्नेछ । हरेक खेलको विजेताले २५ हजार रुपैयाँ प्राप्त गर्नेछ । प्रतियोगिताको सर्वोत्कृष्ट खेलाडीले १ लाख, उदियमान खेलाडी, सर्वाधिक गोलकर्ता, गोलकिपरले समान ५० हजार, हरेक खेलको म्यान अफ दी म्याचले १५ हजार रुपैयाँ प्राप्त गर्नेछन् ।