दिक्षान्स खड्का, हेटौडा

ए डिभिजन टोली न्यूरोड टिम (एनआरटी) पाँचौं सस्करणको स्थानीय तह सहिद स्मृति फुटबल प्रतियोगिताको पहिलो खेलमै सोबार स्तब्ध भएको छ । एनआरटी वीरगन्ज युनाइेड क्लबसँग ३–२ ले पराजित हुँदै पहिलो खेलबाट बाहिरिएको छ ।

हेटौंडा–५ स्थित पिप्ले क्याम्पा रंगशालामा एनआरटीमाथिको जितसँगै वीरगन्ज प्रतियोगिताको क्वार्टरफाइनल पुगेको छ । वीरगन्जले सेमिफाइनल प्रवेशका लागि क्यामरुन टोली एभिनियर एफसीको सामना गर्नेछ । वीरगन्जलाई जित दिलाउन कृपा चौधरीले २ र विवेक चौधरीले १ गोल गरे । एनआरटीका लागि दिनेश आले र ललिनुन जामाले गोल गरे ।

खेलमा अग्रता भने एनआरटीले लिएको थियो । दिनेशको गोलबाट एनआरटीले २३ औं मिनेटमा अग्रता लिएको थियो । विकेकले २९ औं मिनेटमा विवेकले गोल फर्काएका थिए । कृपाको गोलबाट ५० औं मिनेटमा वीरगन्जले अग्रता लिएको थियो भने उनले अर्को गोल ७४ औं मिनेटमा थपे । एनआरटीका लागि ललिनुनले ७८ औं मिनेटमा गोल फर्काए ।

म्यान अफ दी म्याच घोषित वीरगन्जका कृपाले १० हजार रुपैयाँ प्राप्त गरे । जिल्ला फुटबल संघ मकवानपुरको आयोजनामा जारी प्रतियोगिताको विजेताले १५ लाख र दोस्रो हुने टोलीले १० लाख रुपैयाँ प्राप्त गर्नेछ ।