काठमाडौं (हाम्रो खेलकुद)– दक्षिण एसियाली फुटबलको पुरुषतर्फको सबैभन्दा महत्वपूर्ण प्रतियोगिताका रुपमा रहेको साफ च्याम्पियनसिपको १४ औं संस्करण भारतमा आयोजना हुने तय भएको छ ।

दक्षिण एसियाली फुटबल महासंघ (साफ) कार्यसमितिको मंगलबार बसेको भुर्चअल बैठकले यो वर्ष साफ च्याम्पियनसिप भारतमा आयोजना गर्ने निर्णय भएको बताइएको छ । भारतमा साफ च्याम्प्यिनसिप हुने निश्चित भएपछि आयोजना स्थल र मिति भने पछि तय हुने बताइएको छ । मार्च १० मा आयोजना स्थल तय हुने जनाएको छ ।

भारतमा साफ च्याम्पियनसिप आयोजना हुन लागेको यो चौथो पटक हो । यसअघि सन् १९९९, २०११ र २०१५ मा च्याम्पियनसिप भारतमा आयोजना भएको थियो । बंगलादेशले ३ पटक, नेपाल, पाकिस्तान, माल्दिभ्स र श्रीलंकाले समान २ पटक आयोजना गरेका छन् । सन् २००८ को संस्करण भने माल्दिभ्स र श्रीलंकाले संयुक्त रुपमा आयोजना गरेका थिए । नेपालले सन् १९९७ र पछिल्लो पटक २०१३ मा साफ च्याम्पियनसिप आयोजना गरेको थियो ।

तीन दशक लामो इतिहास रहेको साफ च्याम्पियनसिपको उपाधि नेपालले अहिले सम्म जित्न सकेको छैन । पछिल्लो पटक सन् २०२१ मा माल्दिभ्समा च्याम्पियनसिप आयोजना हुदा नेपाल पहिलो पटक फाइनल पुगेको थियो । त्यसको फाइनलमा नेपाल भारतसँग ३–० ले पराजित भएको थियो । साफ च्याम्पियनसिप भारतले सर्वाधिक ८ पटक , माल्दिभ्सले २ पटक, बंगलादेश, श्रीलंका र अफगानिस्तानले एक पटक जितेका छन् ।

नेपालमा आयोजना भएको साफ च्याम्पियनसिप अफगानिस्तानले जितेको थियो । अन्तिम पटक अफगास्तिानले २०१५ को संस्करणमा भाग लिएको थियो । यसअघिको संस्करणमा ५ टोलीको सहभागिता रहेको थियो भने यसपटक साफका सबै ७ सदस्य राष्ट्रको टोलीको सहभागिता रहने बताइएको छ ।