एजेन्सी – युरोपा लिगको राउन्ड अफ ३२ पहिलो लेगमा स्पेनिस क्लब सेभिया र फ्रान्सेली क्लब मोनाको सफलता हात पार्दा इटालियन क्लब युभेन्ट्स बराबरीमा रोकिएको छ ।

सेभियाले घरेलु मैदानमा डच क्लब पिएसभी इन्डोभेनमाथि ३–० को सहज निकाल्दै प्रि–क्वाटरफाइनलमा पुग्ने सम्भावना जीवित राखेको हो ।

रोमन सान्चेज पिजुवान रंगशालामा बिहीबार राति भएको खेलमा घरेलु टोलीको जितमा युसुफ एन न्यास्री, लुकास ओकम्पास र नेमान्जा गुडेल्जले गोल गरे । पहिलो हाफको इन्ज्युरी समयको थप गरिएको दोस्रो मिनेटमा युसुफ एन न्यास्रीले गोल गर्दै सेभियालाई अग्रता दिलाए ।

५०औं मिनेटमा लुकास ओकम्पासले गोल गर्दै सेभियाको अग्रता दोब्बर पारे । ५५औं मिनेटमा नेमान्जा गुडेल्जले गोल गर्दै सेभियाको जित पक्का गरे ।

अब दोस्रो लेगको खेल २३ फेब्रुअरीमा हुनेछ । सेभियालाई अघिल्लो चरण पुग्न यही नतिजा कायम तथा २–० को हारले पनि फरक पार्नेछैन । पिएसभीलाई अघिल्लो चरण पुग्न जितको खाँचो छ ।

यस्तै अर्काे खेलमा मोनाकोले जर्मन क्लब बायर लिभरकुसनमाथि ३–२ को रोमाञ्चक जित दर्ता गरेको छ । मोनाकोको जितमा क्रिपिन डिएटा र एक्सेल डिएसीले गोल गर्दा एक गोल उपहार पाएको थियो । लिभरकुसनका मोउसा डियावी र फ्लोरिएन वर्जले गोल फर्काए ।

अर्काे खेलमा युभेन्ट्सले घरेलु मैदानमा अग्रता जोगाउन नसक्दा फ्रान्सेली क्लब नान्टेससँग १–१ गोलको बराबरी खेलेको छ । युभेन्ट्सका डुसान भ्लाहोभिचले गोल गर्दा नान्टेसका लुडोभिच ब्लासले बराबरी गोल फर्काए ।

च्याम्पियन्स लिगको समूह चरणबाट बाहिरिएका टोली र युरोपा लिगको समूह चरणमा दोस्रो भएका टोलीले अन्तिम ३२ मा प्रतिस्पर्धा भइरहेको छ ।

आर्सनल, फेनरवाच, रियल बेटिस, युनियन सेन्ट गिलोइस, रियल सोसिडाड, फ्रेइवर्ग, फियोनुर्ड र फेरेन्कभारोस समूह विजेता बन्दै प्रि–क्वाटरफाइनलमा पुगिसकेको छ ।

अन्य नतिजा

बार्सिलोनाविरुद्ध म्यानचेस्टर युनाइटेड (२–२)

साख्तर डोनेक्सविरुद्ध रेनेस (२–१)

आयाक्सविरुद्ध युनियन बर्लिन (०–०)

साल्जवर्गविरुद्ध रोमा (१–०)

स्पोर्टिङ सिपीविरुद्ध मिट्जेल्यान्ड (१–१)