समूह ‘बी’ बाट भारत र बंगलादेश अन्तिम चारमा पुगिसकेका छन्
दिपेश तिमल्सिना
सिलगुढी (भारत)– महिला साफ च्याम्पियनसिप फुटबलमा नेपाल रहेको समूह ‘ए’ बाट माल्दिभ्स उपविजेताका रुपमा सेमिफाइनल प्रवेश गरेको छ । भारतको सिलगुढीमा जारी च्याम्पिनसिपमा भुटानलाई ३–१ ले हराउँदै माल्दिभ्सले अन्तिम चारको यात्रा तय गरेको हो ।

माल्दिभ्सको जितमा फाधुवा जाहिरले २ र आमिनाथ समिलाले १ गोल गरिन् । भुटानका लागि टंकमाया घलेले गोल फर्काएकी थिइन् । फाधुवाले १८ औं मिनेटमा र आमिनाले ३६ औं मिनेटमा गोल गरेकी थिइन् । खेल सकिन ९ मिनेट बाँकी रहँदा टंकमायाले भुटानका लागि गोल फर्काइन् । इन्जुरी समयको दोस्रो मिनेटमा फाधुवाले गोल थपिन् र माल्दिभ्सको जित पक्का पारिन् ।
नेपाल समूहका सबै तीन खेल जितेर विजेता बनेको थियो भने माल्दिभ्सले तीन मध्ये दुई खेल जितेको छ । नेपालको ९ अंक र माल्दिभ्सको ६ अंक छ भने च्याम्पियनसिपबाट बाहिरिएका श्रीलंकाको ३ र भुटान अंक विहिन रहेको छ । माल्दिभ्सको जितसँगै सेमिफाइनल समिकरण पुरा भएको छ ।

समूह ‘बी’ बाट आयोजक भारत र बंगलादेश सेमिफाइनल पुगिसकेका छन् । तीन टोली रहेको समूहमा भारत र बंगलादेश दुवै अफगानिस्तानलाई हराएर अन्तिम चारको यात्रा तय गरिसकेका छन् । अब शनिबार हुने समूह चरणको अन्तिम खेलले समूह ‘बी’ को विजेताको टुंगो लगाउने छ ।

नेपालले सेमिफाइनलमा शनिबारको खेलमा पराजित हुने टोलीको सामना गर्नेछ । त्यस्तै शनिबारको खेल जुन टोलीले जित्ने त्यसले माल्दिभ्सको सामना गर्नेछ । पछिल्ला तीन संस्करणमा उपविजेता रहेको नेपाल सबै फाइनलमा भारतसँग पराजित भएको थियो ।