एजेन्सी – स्पेनिस ला लिगामा रियल म्याड्रिडले सहज जित दर्ता गर्दै शीर्षस्थानको बार्सिलोनासँगको अंक दुरी छोट्याएको छ ।

रियलले घरेलु टोली ओसासुनालाई २–० ले पराजित गर्दै शीर्षस्थानको बार्सिलोनासँगको अंक दुरी ५ मा छोट्याउँदै उपाधि दावेदारी कायमै राखेको हो ।

पाम्पलोनामा शनिबार राति भएको खेलमा पाहुना टोली रियलको जितमा फेडे भाल्भेर्डे र मार्काे एसेन्सियोले गोल गरे । दुवै गोल दोस्रो हाफमा भएको थियो ।

मुख्य फरवार्ड तथा कप्तान करिम बेन्जेमा र मिडफिल्डर टोनी क्रुसविना नै मैदान उत्रिएको रियलले गोलको लागि दोस्रो हाफ नै कुर्नुपरेको थियो । प्रतिस्पर्धात्मक खेलको ७८औं मिनेटमा भाल्भेर्डेले गोल गर्दै रियललाई १–० को अग्रता दिलाए । उनले भिनिसियस जुनियरको पासमा गोल गर्न सफल भएका थिए ।

८९औं मिनेटमा भिनिसियसले गोल गरेपन भिएआरबाट मान्यता पाएन । त्यसपछि इन्ज्युरी समयको थप गरिएको दोस्रो मिनेटमा परिवर्तित खेलाडी मार्काे एसेन्सियोले गोल गर्दै रियलको जित पक्का गराए ।

६६औं मिनेटमा ड्यानियल सेवालोसको स्थानमा मैदान छिरेका एसेन्सियोले अर्का परिवर्तित युवा मिडफिल्डर अल्भारो रोड्रिग्वेजको पासमा गोल गर्न सफल भएका थिए ।

यस जितसँगै दोस्रो स्थानमा रहेको रियलको २२ खेलबाट ५१ अंक पुगेको छ । एक खेल कम खेलेको बार्सिलोनाको ५६ अंक छ । पराजित ओसासुना ३० अंक जोडेर १०औं स्थानमा छ ।