काठमाडौं (हाम्रो खेलकुद) – भारतसँग दुई अन्तर्राष्ट्रिय मैत्रीपूर्ण खेल खेलेर नेपाली राष्ट्रिय महिला फुटबल टोली आइतबार स्वदेश फर्किएका छन् ।

नेपाली टोलीलाई एन्फाका प्रवक्ता सुरेश शाह लगायतका पदाधिकारीले त्रिभुवन अन्तराष्ट्रिय विमानस्थलमा स्वागत गरे । नेपालले भारतसँग चेन्नईमा भारतसँग दुई अन्तर्राष्ट्रिय मैत्रीपूर्ण खेल खेलेको थियो । दुवै खेल बराबरीमा सकिएको थियो ।

चेन्नईस्थित जवाहरलाल नेहरू स्टेडियममा शनिबार भएको दोस्रो मैत्रीपूर्णमा नेपालले घरेलु टोली भारतसँग गोलरहित बराबरी खेलेको थियो । त्यसअघि बुधबार भएको पहिलो मैत्रीपूर्णमा नेपालले २–० ले पछि पर्नुका बावजुत खेलको अन्तिम समयमा दुई मिनेटको अन्तरमा दुई गोल गर्दै हारबाट बचेको थियो । नेपालका लागि दुबै गोल सावित्रा भण्डारीले गरेकी थिइन् ।

भारतसँगको दुई बराबरीसँगै नेपाल भारतसाग पछिल्लो तीन खेलमा अपराजित रहन सफल भएको छ । नेपालले गत भदौंमा भएको साफ च्याम्पियनसिपमा भारतलाई १–० ले पराजित गर्दै फाइनलमा पुगेको थियो । नेपाल र भारत हालसम्म १३ पटक आमाने–सामाने भएका छन् । जसमा भारत ८ खेलमा विजयी हुँदा नेपालले १ खेल जितेको छ । ४ खेल बराबरीमा सकिएको छ ।

नेपाल र भारत दुवैले महिला ओलम्पिक छनोटको पहिलो राउन्डको खेलको तयारी स्वरुप मैत्रीपूर्ण खेल खेलेको हो । छनोटको पहिलो राउन्डमा नेपाल समूह ‘सी’ मा रहेको छ ।

नेपाल रहेको समूहमा भियतनाम, प्यालेस्टाइन र अफगानिस्तान छ । भारत रहेको समूह ‘जी’ मा तुर्कमिनिस्तान र किर्गिस्तान छ । ओलम्पिक क्वालिफायर अप्रिलमा हुँदैछ ।