दिपेश तिमल्सिना
सिलगुढी (भारत)– धेरैलाई लागेको थियो, भारतको सिलगुढीमा जारी महिला साफ च्याम्पियनसिपमा फाइनलमा नेपालको भेट फेरी पनि भारतसँग हुनेछ । अघिल्ला तीन संस्करणका आधारमा अनुमान गलत पनि थिएन । तर, यसपटक दृश्य फरक भएको छ, उपाधिको सबै भन्दा बलियो दाबेदार भारतसँग नेपालले फाइनलअघि सेमिफाइनलमा भेट्नु परेको छ । साफ च्याम्पियनसिपको इतिहासमै भारत समूह चरणको अन्तिम खेलमा शनिबार बंगलादेशसँग गोलरहित बराबरीमा रोकिएपछि समूह उपविजेता बन्दै नेपालसँगको भेट पक्का गरेको थियो ।
कञ्चनजंगा रंगशालामा भारत र बंगलादेशको खेल हरेर फर्केपछि नेपाली टोलीकी २१ बर्षे कप्तान रणुका नगरकोटीले धेरैको अनुमान जस्तै भारतसँगै फाइनल पर्ला भन्ने सोचेको बताइन् । भारतसँग सेमिफाइनल परेको छ कत्तिको दबाब परेको छ भन्ने प्रश्नमा रणुकाको जवाफ थियो ‘भारतलाई फाइनलमा भेट्छौं भन्ने सोचेका थियौं । सेमिफाइनलमा भेट भएको छ । जसरी भएपनि आफ्नो खेल खेल्ने हो । भारतनै भएपनि आफ्नो खेल खेल्छौं ।’
सन् २०१० मा साफ च्याम्पिनिसिपमा नै १५ बर्षको उमेरमा डेब्यू गरेकी रौतहटकी रेणुकाले नतिजा के होला भन्ने प्रश्नमा हास्दै भनिन्,‘अब त्यो त खेलपछि नै थाहा होला । तर हामी सतप्रतिसत दिएर खेल्नेछौं ।’ एपिएफबाट व्यवसायिक खेल जीवन सुरु गरेकी रणुका अर्को बर्ष नेपाल आर्मी क्लबमा पुगेकी थिइन् । अहिले फेरी उनी एपिएफबाट खेल्दै आएकी छिन् ।
घुँडाको चोटको कारण १२ औं दक्षिण एसियाली खेलकुद (साग) गुमाइएकी रुणुकाले दुई साताअघि साताअघि काठमाडौंमा मलेसियासँग भएको मैत्रीपूर्ण खेलमा राष्ट्रिय टोलीको कप्तानी सम्हालेकी थिइन् । त्यसयता चार खेलमा उनीको नेतृत्वमा नेपाल विजयी हुँदै आएको छ । मलेसियालाई १–० ले हराएको नेपालले साफ च्याम्पियनसिपमा भुटानलाई ८–०, माल्दिभ्सलाई ९–० र श्रीलंकालाई १–० ले हराएको थियो ।
