एजेन्सी – फ्रान्सेली फरवार्ड करिम बेन्जेमाको गोलसँगै स्पेनिस क्लब रियल म्याड्रिडले युइएफए च्याम्पियन्स लिगको प्रि–क्वाटरफाइनलको दुवै लेगमा इंग्लिस क्लब लिभरपुललाई पराजित गर्दै क्वाटरफाइनलमा स्थान बनाएको छ ।

रियलले दोस्रो लेगमा १–० को तथा समग्रमा ६–२ को फराकिलो जितसँगै अन्तिम आठमा स्थान पक्का गरेको हो । पहिलो लेगमा २–० ले पछि पर्नुका बावजुत रियलले ५–२ को सानदार जित दर्ता गरेको थियो ।

सान्टियागो बर्नबेउमा बुधबार राति भएको प्रतिस्पर्धातमक र रोमाञ्चक खेलमा रियलको जितमा दोस्रो हाफमा कप्तान बेन्जेमाले गरेको गोल नै निर्णायक बन्यो । उनले ७८औं मिनेटमा ब्राजिली विंगर फरवार्ड भिनिसियस जुनियरको पासमा गोल गर्न सफल भएका थिए ।

लिभरपुलले पनि घरेलु टोलीविरुद्ध गोलको अवसर सिजैना गरेपनि फिनिसिङको नमुना देखाउन सकेन । सातौ मिनेटमा मोहम्मद सलाहको पासमा डार्विन नुनेजको प्रहारलाई रियलका गोलरक्षक थिवाउट कोर्टुवाले विफल पारे ।

१४औं मिनेटमा भिनिसियसको प्रहारलाई लिभरपुलका गोलरक्षक एलिसन बेकरले विफल पारे । २०औं मिनेटमा एडुआर्डाे कामाभिंगाको झन्डै २५ यार्ड टाढाको प्रहार क्रसबारमा लागेर बाहिरिदा रियल अग्रता लिनबाट चुक्यो ।

२२औं मिनेटमा लुका मोड्रिचको प्रहार सदुपयोग हुन सकेन । ७८औं मिनेटमा बेन्जेमाले गोल गर्दै रियललाई १–० को अग्रता दिलाए ।

इन्ज्युरी समयमा रियलले पेनाल्टीको अपिल गरेपनि भिएआरले त्यसलाई मान्यता दिएन । कोन्सटानटिनोस टिसिमिकासले पेनाल्टी बक्समा ह्यान्ड गरेको भन्दै रियलले अपिल गरेको थियो ।